Qyzym, qaıda barasyń?..

Vashıngton. «Aq úıden» onsha alys emes. Kóshede anadaıdan sóılep: «Qazaqsyzdar ma?» – dep kúle jaqyndaǵan egde áıel qazaq ekenimizdi bilgende keremet qýanǵan. «Qazir jaqsy boldy, elden adamdardy jıirek kóretin boldym. Sol sebepten saǵynyp ketkende osylaı qaraı aıańdap, issaparǵa kelgen qazaqtardy kórip, qazaqsha sóılep, sherimdi tarqatyp alamyn», – degen apaıǵa: «Iá, apaı, qaıdan júrsiz, sózińizge qaraǵanda munda birazdan turatyn tárizdisiz?» – dedim, «Aınalaıyn-aı, jalǵyz qyzym bar edi, sol oqımyn dep muhıt asyp, odan amerıkandyqqa turmysqa shyqty. Jyladym, syqtadym, biraq qaıteıin, qyzym sheshimin ózgertken joq. Sodan qyzyma degen saǵynyshym qoımady, birneshe jyldan keıin Tarazdaǵy úıimdi tastap kóship keldim – dep bastady áńgimesin tanysym. Alǵashynda til bilmeı qatty qınaldym, endi qazir dúkennen ózime qajetti satyp alatyndaı tildik qorym bar. Nemerelerim grandmaze, grandmaze deıdi, biraq qazaqtyń nemeresindeı emes, aptasyna bir kórsem razymyn. Olar meni, men olardy túsinbeı, qyzymdy kózimniń aıasynda kórgenime medet qylyp júrip jatyrmyn. Eki jylda bir ret Tarazǵa baryp, qazaqsha sóılep, toıda, shaqyrǵan jerde áńgime aıtyp, án tyńdap, bir jasap qalamyn, sodan keleside qarajatymdy qamdap, saparǵa shyqqanǵa deıin kún sanaımyn. Keıde úıde ózimmen-ózim osy men qazaqshany umytyp bara jatqan joqpyn ba dep ózimmen ózim sóılesip alamyn. Búgin de bir sátti kún boldy, ózderińdi kezdestirip, qazaqsha sóılep qaldym», – dep qımaı qoshtasqan. Taıaýda áleýmettik jelide alty til biletin qazaq qyzynyń úndilik jigitke turmysqa shyq­qany, olardyń nekesiniń sol eldiń dinı rási­mimen qıylǵany jazylsa, endi bir qazaqstandyq uıym sheteldikterge qalaı turmysqa shyǵýǵa bolatyndyǵy jaıly semınar ótkizetinin aıtyp, soǵan qyzdardy shaqyrǵan jarnamasyn beripti. «Gımeneı» atty neke agenttigi «Sheteldikke qalaı tıimdi kúıeýge shyǵýǵa bolady?» degen semınardy demalys kúnderinde ótkizetinin, Batys Eýropadan bolashaq kúıeýdi qalaı tabýǵa bolatyny, qalaı aldanyp qalmaý jóninde keńes beretinin aıtyp, áleýmettik jeliniń áleýetin paıdalanyp, jarııaǵa jar salypty. Sonda deımin-aý, bizdiń qoǵamǵa báribir me, bas ofısi Berlınde ornalasqan agenttiktiń qyzmetkeri qyzdarymyzdy shetel asyryp jatsa da úndemeı, qyzym, qaıda barasyń, demeımiz be? Osy joldardy jazyp otyrǵanda Vashıngton kóshelerin kezip qazaq izdegen muńdy ananyń beınesi kóz aldyma oraldy... Anar TО́LEÝHANQYZY, «Egemen Qazaqstan»