Antqa adal Azat

Oblystyq ishki ister depar­tamentiniń bastyǵy, general-maıor Berik Bilálov jýyrda Qyzyl­jar aýdandyq ishki ister bóliminiń ýchaskelik ınspektory Azat Muhamedınniń erligin jeke quramǵa úlgi etip, oǵan marapat kórsetti. Al Azatqa qandaı qıyn-qystaý kezde de shapshań sheshim qabyldaýdy, ózgelerge kómek qolyn sozýdy ómirdiń ózi úıretti. Shalǵaıdaǵy qazaq aýylynda týyp-ósken ol kúshtik qurylymda qyzmet etemin dep oılamaǵan. Táýel­sizdiktiń eleń-alań shaǵynda Petropavl pedagogıkalyq ınstıtýtyn bitirip, tarıh páni mamandyǵyn alǵanymen jumys tappaı qatty qınalǵan. Sodan sıyrdyń tilindeı dıplomdy sandyqqa salǵan kúıi áldekimderdiń jón silteýimen Reseıdiń Ekaterınbýrg qalasynan bir-aq shyqqan. Munda aıryqsha maqsattaǵy mılısııa bólimine ornalasýyna bala kezden júıeli túrde aınalysqan sporttyń, ustanǵan salamatty ómir saltynyń kóp paıdasy tıdi. Shette júrgen tórt jyl ishinde shynyǵyp, shymyrlandy. Armenııa, Grýzııa, Cheshenstan sekildi «ystyq núktelerde» bolyp, tatý-tátti birlikke eshteńe jet­peıti­nin uǵyndy. Mol tájirıbe jınaq­t­ap, elge oralǵannan keıin oblys­tyq ishki ister basqarmasyna qyz­metke turdy. Biraz jyl «Ar­lan» arnaıy maqsattaǵy topqa, «Kúzet» mekemesiniń kadr bólimine jetekshilik etti. Temirdeı tártipti súıetin, ózgelerden de osy qasıet­ti talap etetin Azat ózine júk­telgen mindetterdi árdaıym jaýapker­shilikpen atqaryp, podpolkovnık shenine deıin kóterildi. Al myna oqys oqıǵaǵa oıda-joqta kezikti. Kóligin avtoturaqqa qoıyp, túngi taza aýamen keýde kere tynystap kele jatqanda qyra­ǵy kózine toǵyz qabatty úı­diń birinshi qabatynan býdaqtaı shyq­qan qoıý tútin shalyndy. «О́rt!» degen sýmańdaǵan sýyq oı tula­boıyn qaryp jibergendeı boldy. Alǵa qaraı janushyra umty­lyp, jolaı kezdesken adamdarǵa qut­qarý qyzmetine telefon soǵý­dy aıtyp úlgerdi. Temir esik tars jabyq. Ýaqyt uttyrmaı, páter­ge balkon arqyly kirýge bel baı­la­ǵanymen, eki metr bıiktikke ózdi­gi­nen kóterilý múmkin bolmady. Tyǵy­ryqqa tirelip, ne isterin bil­meı turǵanda qasynan óte bergen bir jasóspirimdi kórip, kómekke shaqyrdy. Onyń demeýimen bal­konǵa yrǵyp túsip, ishke engende kók tútin arasynan essiz jatqan adamnyń sulbasy kórindi. Ony qaýipsiz jerge shyǵaryp, úıge qaıta endi. Ondaǵy oıy – taǵy bireýler qalyp qoımady ma degen kúdik. Bólmelerden otqa oranǵan zattardy dalaǵa shyǵaryp, kompıýter symyn toktan aıyra bergende qol­qany qapqan ashy tútinnen basy aınalyp, álsireı bastaǵanyn sezdi. Áıteýir balkon arqyly syrtqa shyǵyp úlgerdi. Urymtal tusta qıynnan qıystyryp jol taýyp, qyzyl tili sýmańdaǵan órtke qarsy et qyzýymen aralasyp ketken Azat 50 jastaǵy óner ıesin ajal tyrnaǵynan arashalap qalǵanyn bilgen joq. Qas qaǵym ýaqyt ishinde ábjil qımyldamaǵanda onyń arty úlken ókinishke uryndyryp, opyq jegizeri ábden yqtımal edi. Azat – otbasynda úlgili áke, ornyqty otaǵasy. Jan-jary Gúláıim ekeýi altyn asyqtaı eki qyz ósirip otyr. 47 jastaǵy azamat qoıan-qoltyq urystan sport sheberligine kandıdat. Talaı ret aımaqtyq jarystarǵa qatysyp, júldeger atanǵan. Qurysh bolattaı shynyǵýyna, adamgershilik asyl qasıetterdiń qalyptasýyna desant­tar vzvody quramynda aza­mat­tyq boryshyn óteýi zor yq­palyn tıgizgenin beıbit kúnniń batyry jasyrmaıdy. Iá, erlik ýaqyt, jas talǵamaıdy. Antqa adal, sertke berik Azattyń bul áre­keti jastar úshin tálim-tárbıelik ma­ńyzy zor ónege bolary anyq. О́mir ESQALI, «Egemen Qazaqstan» Soltústik Qazaqstan oblysy