Aýyldaǵy sýpermarket

Alys aýyldardaǵy dúkenderdiń sıqy bárimizge belgili ǵoı... Bir bólmege taýardy úıip tastaǵan. Tazalyǵyn bylaı qoıǵanda, tar bolǵandyqtan ishinde aınalyp júretin jer joq. Attap bassań bir zatqa shalynasyń. Dúken ıesi áıteýir, saýdasy júrgenine máz. Jaqynda Jýaly aýdanynyń eń shalǵaıda jatqan Qoshqar ata aýylyna barǵanda mańdaıynda «sýpermarket» degen jazýy bar dúkendi kórip, ań-tań bolǵanymyz ras. Oıbaı-aý, Qoshqar ata degenińiz oblystyń shetinde, jeldiń ótinde jatqan aýyl emes pe? Qys túse qoshqaratalyqtar ortalyqpen qosh aıtysyp, jol qatynasy tipten qıyndap, kún jylynǵansha tereń saıda tym-tyrys jatyp alady. Endeshe syrtpen baılanysy az osyndaı shaǵyn aýyldan sýpermarket ashý qanshalyqty tıimdi? Aty bar da, zaty joq saýda orny bolar degen kúdikpen álgi dúkenniń esigin ashtyq. Joq, alys aýyldaǵy myna sýpermarkettiń qaladaǵy saý­da oryndarynan bir mysqal da kem emes eken. Ishi keń ári sándi, sosyn taýarǵa da óte baı. Tipti, aýyl­dyqtar úshin jat kórinetin temir arbalar da tur. Biz bas suq­qan on-on bes mınýttyń ishinde tórt-bes tutynýshy saýda jasap ketti. – О́mir boıy osy saýda salasynda eńbek etip kelemin, – deıdi sýpermarket ıesi Lázzat Nurpeıisova. – Sondyqtan bul salany bir kisideı bilemin. Ras, alǵashynda shalǵaıdaǵy aýylda saýdamyz júre me, joq pa degen suraq mazalaǵan. Biraq biz taýardy kóp ákelýdiń arqasynda osy tóńirektegi aýyldardyń kóterme saý­da ortalyǵyna aınaldyq. Qys túse jaqyn aýyldar, tipti, kór­shi Oń­tús­tik Qazaqstan oblysy, Báı­di­bek aýda­nynyń keıbir eldi me­ken­­­deri bizden kelip taýar alyp tu­ra­­dy. О́ıt­keni, qystyń qytymyr kúnderinde de biz ortalyqpen baılany­symyzdy úzbeı, barlyq taýarlardy ýaqtyly jetkizip otyramyz. Jáne barlyq zatqa óz baǵasynyń on paıyzdaı kóleminde ǵana ústemaqy qoıamyz. Iá, shynynda sóredegi baǵalar tym qymbat emes. Tipti, keıbir zat­tar­­dyń baǵasy áldeqaıda tómen eke­ni­­ne kóz jetkizgen keıbir árip­tes­­terim qaltalaryn qarmanyp, saý­­da jasap jatty. Mine, «Balýanǵa oń-terisi bir» demekshi, tirliktiń kózin taýyp, eńbek ete biletinder úshin tabys kilti dala-qala bop bólin­­­beı­­tinin osy joly anyq ań­ǵar­­­dyq. Aıtpaqshy, shalǵaıda jatsa da sharýasy túzelip kele jatqan Qosh­­qar atanyń turǵyndary úshin taǵy bir qýanyshty jaǵdaı bar. Aýyl­­­dyń bıik jerinen eki qabat­ty jańa mektep ǵımaraty boı kóterý­­de. Eski mektep ǵımaratynyń irge­ta­sy 1967 jyly qalanǵan eken. Kú­tip-ustaýdyń arqasynda búgin­ge jetti. Áıtse de aýyl ákimi Mel­­de­­bek Aıdosovtyń aıtýyna qara­ǵan­­da, bul eski ǵımaratty al­da­ǵy ýaqytta kúrdeli jóndeýden ót­ki­zip, bir jaǵynan balabaqsha ashyp, bir buryshyn aýylǵa kelgen jas mamandarǵa baspana retinde ber­mek eken. Aýyldyń aıbynyn asqaqtatyp, ajaryn ashyp tur­ǵan 250 oryndyq jańa mektep ǵı­ma­ra­tynda aldaǵy oqý jylynda alǵa­sh­qy qońyraý soǵylady. Oralhan DÁÝIT, «Egemen Qazaqstan» Jambyl oblysy, Jýaly aýdany, Qoshqarata aýyly