Shymbulaqtyń Kýrshevelden nesi kem?

Biz elimizdiń aspanynda ushyp júrgen torǵaıymyzdy maqtasa da, máz bolyp qalatyn halyqpyz. Bul kóńildiń aqtyǵyn, júrektiń tazalyǵyn bildiredi. Teginde maqtanatyn nársege maqtana, qýanatyn nársege qýana bilgenge ne jetsin! Elimizge qatysty qýana jarııa etýge jaramdy jaqsy habarlar árdaıym bolyp turady. Sonyń biri – jaqynda álemge áıgili Forbes jýrnalynyń reseılik bólimshesi Almaty túbindegi Shymbulaq shańǵy kýrortynyń álemdegi eń tańdaýly top-ondyqty bastap turǵandardyń biri ekenin atap kórsetipti. Shańǵy kýrorttary­nyń reıtıngilerin anyqtaýdy RoomGuru.ru ınternat-portalymen birge júrgizgen Forbes mamandary olardy birneshe qyrynan alyp qarastyrǵan eken. Buǵan kýrort­tyń ornalasqan aýmaǵy, tabıǵaty­nyń janǵa jaılylyǵy, aýasynyń tazalyǵy, onda demalý quny men jasa­latyn servıstik qyzmeti túgel kiredi. Bir qyzyǵy, jahan jurty búginde qysy-jazy japa-tarmaǵaı baryp demalyp jatatyn Alpidegi Kýrshevel bul ondyqtyń tiziminde joq. Al Almatynyń Shymbulaǵy top toǵysynda ekinshi bolyp tur. Osyndaıda budan bes ǵasyr buryn ómir súrgen noǵaıly-qazaq­tyń uly jyraýy Dospambet baba­myzdyń «Aınala bulaq basy teń, Azaýlynyń Ystanbuldan nesi kem?» dep keletin tolǵamdy tol­­ǵaýy eriksiz oıǵa oralady. Shynyn­da da Shymbulaqtyń ózge jaqtan nesi kem? Aspanmen talasqan taý­dyń ushar basynda, teńiz deń­geıi­nen 2 270 metr bıiktikte, Tal­ǵar asýynyń qııa bókterindegi Shym­­bulaq shatqalynyń qoı­naýyn­da jatqan atyraptyń aýasy qandaı saf, aýmaǵy qandaı kór­kem! Munda taý shańǵysy sport kesheni ashylǵanyna da 60 jyldan asyp ketipti. Dáliregi, 1954 jyldyń qysynda kelýshilerge qushaǵyn aıqara ashqan shańǵy trassasy sodan beri kópshilikke qaltqysyz qyzmet etip kele jatyr. Shatqaldaǵy eni 25 metrge tolatyn jarys jolynyń shańǵyshylar úshin barynsha qolaıly ekenin de munda kelgenderdiń bári aıtady. Mamandar trassanyń teh­nı­kalyq sıpattamasy jaǵynan Eýro­panyń joǵary deńgeıdegi jarys joldarynyń eshbirinen kem emes ekenin de alǵa tartady. Mundaǵy syrǵanaq qarynyń sapa­sy da jo­ǵary. Osylardyń nátı­jesin­de Shym­bulaq shańǵy jolynda j­oǵary jyldamdyq kórsetýge múm­kin­dik beredi. Sońǵy jyldary shatqalǵa demalý úshin keletin týrıster sany da artyp keledi. Aıtalyq, 2010 jyly bulardyń qatary nebári 12 myń adam bolsa, kelesi jyly 33 myńnan asyp túsken. Qazir 50 myńǵa jýyqtaıdy. Osynda kelýshiler arasynda kezinde kórshi elderdiń prezıdentteri de, ártúrli hanzadalar da boldy. Degenmen, shańǵy kýrortyna atbasyn tireýshilerdiń basym bóligin óz otandastarymyz qurap otyr. Olar shamamen 75 paıyzǵa turaqtalsa, shetelderden kelýshiler 25 paıyzdyń mańynan qaıyrylady. Al keshende qysqy sport túrlerine qyzyǵýshylyq bildiretin adamdardyń bárine jaqsy jaǵdaı jasalǵan. Munda tek taý shańǵy mektebinde ǵana 40-qa jýyq nusqaýshy jumys isteıdi. Olar bir mezgilde 40 adammen derbes jumystar júrgize alady. Sonymen qatar, toptyq sabaqtar túrinde jattyǵýlar jasalatyn bolsa, birden 200 adamdy shańǵy tebýge úıretýge múmkindik týar edi. Aıtýly kýrorttyń taǵy bir ereksheligi retinde Medeý-Shymbulaq aspaly jolyn aıtýǵa bolady. Tasymal qashyqtyǵy jaǵynan ol álemde osyndaı joldardyń arasyndaǵy úshinshi oryndy alady. Onyń arqanymen syrǵyp júretin 6 adamdyq 114 kabınasy 2 myńnan astam jolaýshyny 15 mınýtta dittegen qaptalǵa jetkizip beredi. Aspaly joldyń qaýipsizdik deńgeıi de joǵary. Ol halyqaralyq qaýipsizdik standarttaryna tolyq saı jasalǵan. Budan bólek, kýrorttyń taý shańǵy baýraılary shańǵy sporty túrleriniń halyqaralyq federasııasynyń sertıfıkatyn alǵan. Endi Forbes jýrnalynyń top-ondyǵy kóshin Reseıdiń Sochı óńirindegi Krasnaıa polıana kýrortynyń bastap turǵanyn da aıta keteıik. Onda jeti kúndik demalys ýaqytynyń quny 101,4 myń rýblge túsedi. Al Shymbulaq eki adamǵa bir aptalyq jazǵy dem­alys ótkizý úshin bar-joǵy 39 myń rýbl alady eken. Máskeýden ushyp kelip-qaıtatyn bılettiń pulyn qosqanda, bul shyǵyn 81 myń rýblge barady. Sol sııaqty bul sapta Shahdag (Ázerbaıjan, 61 myń rýbl), Sheregesh (Reseı, Kemerovo oblysy, 65,4 myń rýbl), Bakýrıanı (Grýzııa, 55,6 myń rýbl), Býkovel (Ýkraına, Lvov, 55,3 myń rýbl), Insbrýk (Avstrııa, 141,2 myń rýbl), La Molına (Ispanııa, Barselona, 94 myń rýbl), Bıarrıs (Fransııa, 151,8 myń rýbl), Engadın-Sankt-Morıs (Shveısarııa, Sıýrıh, 137 myń rýbl) sekildi taýly kýrorttar bar. Serik PIRNAZAR, «Egemen Qazaqstan» Sýretterdi  túsirgen Dosjan Balabekuly