Ydys týyndatqan urys

Zaman ózgerdi me, álde adamnyń ózgergeni me, «Quda, quda degizgen, quıryq-baýyr jegizgen» dep bir-birin Qudaıyndaı syılaıtyn otbasylardyń arasynda da daý-janjal bolyp turady. Mahambet aýdanynda turatyn qudalardyń biri óz aralaryndaǵy urys-keristi sheshý úshin sotqa júginipti. Quda­lardyń syılastyǵyna syna túsýine tómendegi jaıt sebep bolǵan. Bir-birin unatqan eki jas otaý quryp, zańdy nekege tirkelmese de ata-analary qudalasypty. Alaıda, ene men kelin arasynda daý týyndap, jas jubaılar ajyrasyp tynǵan. Kóńili ábden qalǵan bolýy kerek, arada biraz ýaqyt ótken soń kelinniń anasy qudaǵıynan qyz jasaýyn qaıtarýdy ótinedi. Jigittiń sheshesi kelinniń jasaýyna berilgen zattardy túgelge jýyq qaıtarǵanmen, tek eki dana hrom men shynydan jasalǵan ydysty bermeı qoıǵan. Keri qaıtarylmaǵan qos ydys qudaǵılar arasyndaǵy ók­pe-renishti odan saıyn údetip, aǵaıyn-týǵanynyń arasyna keń jaıyl­ǵan daý sotqa deıin jetti. Sot barysynda daý-janjaldyń týyndaýyna sebep bolǵan qos ydystyń quny 24 000 teńgeni quraıtyny anyqtaldy. Zańdy nekede turmasa da ulyna az ýaqyt jar bolǵan kelininiń qos ydysyn bermeı kergigen qudaǵı sotqa shaqyrtý alǵanda jumsaryp sala berdi. Sóıtip, jigittiń anasy qu­da­ǵıynyń qos ydysyn yń-shyń­syz qaıtardy. Qudaǵılardyń me­dıa­sııalyq tártippen kelisimge kelýine baılanysty is óndiristen qysqartyldy. Joldasbek ShО́PEǴUL, «Egemen Qazaqstan» ATYRAÝ