Jazǵy dızel qymbattaýy múmkin

Energetıka mınıstrligi tamyzdyń basynda jazǵy dızel otyny shekti baǵasyna shekteýdi alyp tastaýdy josparlap otyr. Al qysqy dızelge shekteý bolǵan joq. Buǵan deıin onyń baǵasy naryq arqyly qalaı rettelse, ári qaraı da solaı rettele beredi. Energetıka vıse-mınıstri Áset Maǵaýovtyń aıtýynsha, jazǵy dızeldiń shekti baǵasyn alyp tastaǵannan keıin «solıarkanyń» bir lıtri 15-16 teńgege qymbattaýy múmkin. Odan joǵary kóterilmeýi tıis. Jazǵy dızel otynynyń shekti baǵasyn alyp tastaýdyń bas­ty sebebi – kórshi eldermen baǵa aıyrmashylyǵy. Qazaqstanda dızeldiń shekti baǵasy – bir lıtri úshin 99 teńge bolsa, Qyrǵyzstanda – 150, al Reseıde 180 teńgege deıin jetip otyr. Shekara mańynda turatyn reseılikter men qyrǵyzstandyqtar osyny paıdalanyp, arzan qazaqstandyq dızeldi tonnalap tasyp júr. Tranzıtpen ótetin júk mashınalarynyń baktaryn toltyryp ketetini bylaı tursyn, shekaralas aımaqta turatyndar Qazaqstanǵa birneshe ret kelip, dızel otynyn quıyp áketedi. «Biz ondaı áreketterge shekteý qoıa almaımyz. Sebebi, Qyrǵyzstan da, Reseı de Eýrazııalyq ekonomıkalyq odaqtyń músheleri bolyp sanalady», – deıdi vıse-mınıstr Á.Maǵaýov. Al kórshi elderge arzanǵa ketip jatqan dızel otynyna shekteý bolmaǵannan keıin ońtústik pen soltústik aımaqtarda janar-jaǵarmaıdyń osy túrine tapshylyq sezile bastady. Vıse-mınıstrdiń aıtýynsha, búginde osy máselege qatysty talqylaýlar júrip jatyr. Degenmen, qazirdiń ózinde quzyretti memlekettik organdar men qoǵamdyq uıymdar atalǵan bastamaǵa qarsy emes. Janar-jaǵarmaı quıý beketteri de ony tolyǵymen qoldap otyr. Alaıda, Maǵaýov myrza tıisti sheshim qabyldanbaı turyp, spekýlıasııaǵa jol berýge bolmaıtynyn eskertti. «Bizde osyndaı jańalyqtar jarııalanǵan kezde bireýler baǵamen oınaı bastaıdy, endi bireýler janar-jaǵarmaıdy ustap qalyp, baǵanyń kóterilgenin kútedi. Ondaı spekýlıasııaǵa jol berilmeıdi. Jańaǵydaı áreketter anyqtalsa, tıisti jazalaý sharalary qoldanylady», – deıdi vıse-mınıstr. Onyń sózine qaraǵanda, mınıstrlik dızeldi otyn saýdasynda  spekýlıasııaǵa jol bermeý maqsatymen shekti baǵany tezdetip alyp tastaýdy kózdeıdi. Tamyzdyń basynda resmı sheshim shyǵarylýy tıis. Osydan keıin dızel otynynyń baǵasy 115 teńgege deıin qymbattaıdy degen boljam bar. Alaıda, aýyl sharýashylyǵy ónimin óndirýshiler úshin jeńildik baǵa (79 teńge) saqtala beredi. Arman ASQAROV ASTANA