Para alamyn dep tutyldy

Jastardy sybaılas jem­qor­lyqqa baýlyǵandy estip pe edińiz? Estimeseńiz aıtaıyq, Atyraýda osyndaı dástúr paıda boldy. Máselen, jeke notarıýs K.Haırýllın ózinen tálim-tárbıe alýǵa kelgen jas mamandy notarıattyq qyz­metpen aınalysýdyń qyr-syryna qanyqtyrýdy emes, kerisinshe, jemqorlyq isterge baýlypty. Olaı deıtinimiz, qý qulqynynyń qamyn kúıt­tegen jeke notarıýs ádilet departamentiniń laýazymdy tulǵalarynan notarıýstyń lısenzııasyn alyp berýge kómektesetinin emeýrinmen bildirgen. Osy kómegi úshin jas mamannan 20 000 AQSh dollaryn talap etipti. Alaıda, qalaı ıse, solaı boı túzeıtin jas shybyq keıpindegi jasbýynnyń ókili buǵan kóne qoımapty. Sóı­tip, jeke notarıýstyń zańǵa qaıshy keletin teris áreke­tin áshkerelep, sybaılas jemqor­lyqtyń jolyn kesetin arnaýly qyzmet ókilderine aryzdanypty. Artynsha jeke notarıýs óziniń qyzmettik kabınetinde 10 000 AQSh dollaryn alý kezinde qolǵa tústi. Alaıaqtyq jáne para berýge arandatýshylyq aıybymen kináli dep tanylǵan ol 5 jyl merzimge shartty túrde bas bostandyǵynan aıyryldy. Aıtqandaı, endi ol ómir boıyna notarıattyq qyzmetpen aınalyspaıtyn boldy. Joldasbek ShО́PEǴUL, «Egemen Qazaqstan» ATYRAÝ