Fýtbolshynyń jaraqat alǵanyn pıssa jep toılaıdy

Fýtboldan azýly Argentına qurama koman­dasynyń shabýylshysy Gonsalo Igýaın jaqynda Italııadaǵy Neapol qalasy­nyń «Napolı» komandasynan Týrınniń «Iýven­týsyna» ótken bolatyn. «Iýventýs» basshylyǵy ony satyp alý úshin 90 mln. eýro jumsady. Bul habar Neapol fýtbol súıer qaýymyn qatty qapalandyrdy. Sebebi, osy maýsymda 36 gol soǵyp, Italııa chempıonatynyń úzdik surmergeni atanǵan argentınalyq jergilikti «Napolı» komandasyn «skýdettonyń» ekinshi ornyna bir-aq shyǵarǵan bolatyn. Odan bólek, Igýaın «Napolı» sapynda 2013/2014-fýtbol maýsymynda Italııa kýbogy men sýperkýbogyna qol jetkizgen. Osylaısha, «Napolı» komandasyn ógizdeı órge súırep, jergilikti jurttyń qaharmany atanǵan áıgili fýtbolshy Týrınniń «Iýventýsyna» aýysyp, bir-aq sátte «halyq jaýyna» aınalyp ketti. Kúni keshe Gonsalony pir tutyp júrgen fanattar búginde ony satqyn dep atap, fýtbolshynyń jeıdelerin órteýde deıin bardy. Tipti, Neapoldaǵy meıram­hanalardyń biri jergilikti halyqtyń ashýyn týdyrǵan bul máselege baılanysty erekshe usynys jasamaqshy. Naqtyraq aıtsaq, Neapol qalasyndaǵy Show Pizza meıramhanasy qala turǵyndary men qonaqtaryna arnap erekshe usynys daıyn­dap jatyr. BBC agenttiginiń málimetine sáıkes, Gonsalo Igýaın «Iýventýs» sapynda oınap júrip jaraqat alǵan kúnderi mekeme «Margarıta» pıssasyn qomaqty jeńildikpen usynady. Osylaısha, argentınalyqtyń alǵan árbir jaraqaty restoran qonaqtaryna pıssany bar bolǵany 1 eýroǵa satyp alýǵa múmkindik be­redi. Endi fýtbolshynyń jergilikti komandadan ketkenine kóńili tolmaǵan jurt onyń jara­qat alǵanyn pıssa jep toılaıtyn kórinedi. Aıdar О́RISBAEV, «Egemen Qazaqstan»