Atakásipke alǵash ret eskertkish qoıyldy

Elimizde alǵash ret Shopan ataǵa arnalǵan músin qoıyldy. Táýel­­sizdiktiń 25 jyldyǵyna oraı, Bes­qaraǵaı aýdanynyń ortaly­ǵynda, Omby-Maıqapshaǵaı kúre jolynyń boıynda ornalasqan eskertkishke zer salsańyz, bir qolyna jańa týǵan qozyny kóterip, ekinshi qolyna taıaǵyn ustaǵan qarapaıym eńbek adamynyń beınesin kóresiz. Aldyna jaıylyp júrgen óristegi qoılary men ony kúzetken ıtiniń jaıǵasýy da shynaıy shyqqan kompozısııalyq sheshim. Bul – ǵasyrdan-ǵasyrǵa jalǵasyp, atadan balaǵa mura bolyp kele jatqan baba kásibine degen qurmet. Tas tuǵyryna «Uly dala eńbek­kerleriniń dańqy arta bersin!» degen uransóz jazylǵan eskertkishtiń boı kóterýine osy óńirdiń týmasy, mesenat Qaırat Itemgenov demeýshilik kórsetken eken. Bul kúni atymtaı azamat sonymen birge aýdan ortalyǵynda sońǵy jyldary jemisti jumys istep kele jatqan aýmaqtyq ońaltý ortalyǵyna sheteldik shaǵyn avtobýsty syıǵa tartty. – Besqaraǵaılyqtar úshin qoı sharýashylyǵy tańsyq emes. Ke­zinde bul ólkede 200 myńnan astam qoı ósirilgen. Atakásiptiń dańqyn asyrǵan ataqty shopandarymyz da boldy. Qarap tursaq, elimizde metallýrgter men kenshilerge, meha­nızatorlarǵa, basqa da mamandyq ıelerine arnalǵan eskertkishter bolǵanymen, shopannyń músini esh jerde boı kótermepti. Sondyqtan, dala tósinde myńǵyrtyp mal ósirgen eńbekkerlerimizdi qurmet­teý – bizdiń paryzymyz, – dedi aýda­n ákimi Nurjan Toqseıitov. Aýdandaǵy qoǵam belsendisi, zeınetker Vladımır Kazınskıı qa­zaqtyń darhan dalasyn áıgilegen shopandarǵa qurmet kórsetý Elbasy saıasaty men eldiń bereke-birli­giniń jemisi ekenin atap ótti. Atalǵan shara aıasynda aýdan orta­ly­ǵynda merekelik konsert, aýyl­sharýashylyq ónimderiniń jármeńkesi ótti. Dýman ANASh, «Egemen Qazaqstan» Shyǵys Qazaqstan oblysy, Besqaraǵaı aýdany