Qoǵamnan oqshaýlanbaıdy

«Ardos-Júrek» múgedekter birlestiginiń bastamasymen «Ink­lıýzıvti bilim – bolashaqqa bastar jol» jobasynyń tusaýy kesildi. Qalalyq demalys orynda­rynyń birinde ornalasqan oqý-damytý lagerinde búginde 50-ge jýyq júrip-turýy qıyn balalar túrli paıdaly istermen shuǵyl­danady. Qazaqstannyń Birinshi Prezıdenti qorynyń qoldaýyna ıe bolǵan jobany júzege asyrý­shylardyń biri – «Ardos-Júrek» múgedekter uıymynyń jetekshisi Aqjan Kárimniń aıtýynsha, baǵdarlamany qarjylandyrýǵa 2 mıllıon teńge grant jumsalyp, onyń aıasynda ınteraktıvti semınarlar, trenıngter, mýzykalyq, art jattyǵýlar, oıyn terapııalary jumys isteıdi. Aqjan óziniń týabitti múgedektigine qaramastan qımyly shıraq. – Aıaq-qoly bútin, densaýlyǵy jaq­sy qatarlastaryna qaraǵanda, múmkindigi shekteýli balalar ózderin kem sezinip, ja­sqan­shaqtap turatyny jasyryn emes. Osyndaı áleýmettik teńsiz­dikterge jol bermes úshin ınk­lıýzıvti bilim berýdiń artyq­shylyqtaryn paıdalaný, eń bastysy, kishkentaı tulǵanyń jan-jaǵyna qyzyǵýshylyq, qorshaǵan ortaǵa beıimdelý sııaqty qabilet-qarymdaryn ashyp, qalyptastyrý – basty maq­satymyz, – deıdi psıholog maman Ǵalııa Baıazıtova. Osynda eki ulyn ertip ákelgen ata-analardyń biri Tatıana Pıpýs qoǵamdyq uıymǵa degen rıza­shylyǵyn jasyrmaıdy. Qyzyljar óńirinde qolǵa alynǵan qanatqaqty baǵdarlamany uıymdastyrýshylar keleshekte mektep baǵdarlamasy sheń­berinde úıde bilim alatyn múm­kindigi shekteýli balalardy onlaın oqytý júıesimen qamtýdy kózdep otyr. Mundaı sanattaǵy bal­dyr­ǵandardyń sany 150-ge jýyq. О́mir ESQALI, «Egemen Qazaqstan» Soltústik Qazaqstan oblysy