Jańa konsert maýsymy ashylady

7 qyrkúıek kúni elordadaǵy «Astana Opera» teatrynyń Kameralyq zalynda IV konsert maýsymynyń ashylý saltanaty ótedi. Kesh belgili qazaqstandyq mýzykant Eldar Saparaevtyń jetekshiligimen jáne Kameralyq orkestrdiń qatysýymen ótedi. Kameralyq zaldyń jetekshisi ári konserttiń júrgizýshisi, mýzykatanýshy Marjan Jákenovanyń aıtýynsha, jańa maýsymnyń konserti tosyn syılar men qyzyqty baǵdarlamalarǵa toly bolmaq. «Aldaǵy konsert maýsymynda «Astana Operanyń» juldyzdary, ıaǵnı operanyń jetekshi solısteri, talantty aspapshylar, sondaı-aq, Reseıdiń eńbek sińirgen ártisi, áıgili «Máskeý sheberleri» kameralyq orkestriniń birinshi skrıpkashysy Alekseı Lýndın, avstrııalyq pıanınoshy Shtefan Matıas Lademan, bashqurt vıolonchelshi Rústem Habıbýllın sekildi sheberler óner kórsetpek. Bizdiń jas kórermenderimizdi de ár jeksenbi saıyn ótetin tusaýkeserler men tartymdy konsertter kútip tur», – dedi Marjan Jákenova bul týrasynda. Ashylý saltanatynda kórermen ár kezeńniń, máselen, barokko, klassısızm jáne romantızm dáýirlerindegi uly kompozıtorlardyń mýzykalyq shyǵarmalarynan sýsyndaıtyn bolady. Kórermen nazaryna V.A.Mosarttyń, I.S.Bahtyń, F.Shýberttiń tamasha týyndylary usynylady. Konsertke dırıjerlik etetin Eldar Saparaev qazaqstandyq kórermen úshin sheber vıolonchelshi retinde jaqsy tanys, demek, bul onyń dırıjer retindegi alǵashqy debıýti bolmaq. Búgingi kúnge deıin Eldar Saparaev Shveısarııa, Horvatııa, Italııa jáne Germanııa sekildi elderde ótken birneshe halyqaralyq baıqaýlardyń júldegeri atanyp úlgergen. Láıla EDILQYZY