Kitaphanashylar ún qosty

Aqtóbe oblystyq N.Baıǵanın atyndaǵy balalar kitaphanasynyń kitaphanashylary «Rıo-2016» Olımpıadasyna qatysýshylarǵa óz tilekterin bildirdi. Qashanda el maqtanyshtaryn ózgelerge nasıhattaýda úlken sharýa atqaryp júretin kitap­hanashylar bul joly da qarap qalǵan joq. Mektep oqýshylary jazǵy demalysta bolǵandyqtan, balalardy jınap, is-shara ótkizý ońaı emes. Soǵan qaramastan, oblystyq balalar kitaphanasynyń kitaphanashylary jýrnal-krossıng uıymdastyryp, saıabaqta keshkilik demalyp otyrǵan qala turǵyndary men qonaqtarǵa sportshylarymyz týraly málimetter men olar týraly jazylǵan basylymdar taratty. Kózi nashar kóretin qarttarǵa Olımpıadaǵa qatysýshy jastar týraly jazylǵan málimetter men aqparattardy oqyp berdi. Olar, sondaı-aq, «Rıo-2016» Olımpıadasyna qatysýshylarǵa jalyndy sálem joldady. «Rıo-2016   Olımpıadasyna qatysý­shy­larǵa sálem!» dep jazylǵan pla­katty alyp, saıabaqtar men qala turǵyndary jıi júretin kóshelerdi aralady. – Búginde analarymyz taqymyn qysyp, ákelerimiz namysyn qaırap otyrǵan shyǵar. Ult abyroıyn qorǵaıtyn árbir qazaq sportshysy úshin bárimiz de jaýapty ekenimizdi sezinýimiz kerek. Sol sebepti bizdiń ujym kitaphanaǵa kelgen árbir oqyrmanǵa, kóshedegi qarapaıym halyqqa sportshylarymyz úshin jankúıer bolýdyń mańyzy týraly únemi aıtyp otyrady, – deıdi kitaphana dırektory Gúljaınar Qaldına. Jaz mezgilin kitaphanashylar tolyq qazaq sportyna arnap otyr. Olar Olımpıada bastalǵansha lagerler men balabaqshalarda, sport mektepteri men úıirmelerde balalar arasynda sporttyq jarystar ótkizip keldi. Jeńimpaz bolǵan balalardyń keýdesine medal taǵyp, bolashaqta myqty sportshy bolýǵa úndedi. Aınur NERMIEVA AQTО́BE