Kitap oqyǵandar kóp jasaıdy

Ǵalymdar kitapty kóp oqıtyn, merzimdi basylymdardy sholyp shyqqandy unatatyn adamdar eshteńe oqymaıtyn adamdarmen salystyrǵanda birshama uzaq jasaıtynyn anyqtady. Tájirıbege jasy 50-den asqan 3 635 adam qatysqan. Zertteýshiler olardy aptasyna 3 saǵattan artyq oqıtyndar, aptasyna úsh saǵattan az oqıtyndar jáne kitap, gazet-jýrnaldardy múldem oqymaıtyndar dep úsh topqa bóledi. 12 jyl boıy júrgizilgen baqylaý nátıjesinde oqıtyndardyń arasyndaǵy ólim-jitim kórsetkishi oqymaıtyndarǵa qaraǵanda 6 paıyzǵa az ekeni baıqalǵan. Sondaı-aq, kitapqumarlar basqalarmen salystyrǵanda shamamen 23 aıǵa uzaq jasaıtyny belgili boldy. – Adamnyń ómirin uzartýǵa gazet-jýrnalǵa qaraǵanda kitaptyń áseri kúshti. Sebebi, kitap adamdy jańa materıalǵa, tipti, jańa álemge súńgitip jibere alady. Keıipkermen birge ýaıymdaısyń, qýanasyń. Sonyń arqasynda oqyrmannyń oılaý qabileti artady, sózdik qory kóbeıedi, – deıdi ǵalymdar. Tájirıbege qatysqan adamdar qandaı kitap oqyǵanyn aıtpapty. Alaıda, zertteýshiler olardyń kópshiligi kórkem ádebıet oqyǵan dep sanaıdy. Aldaǵy ýaqytta ǵalymdar aýdıokitaptar, elektrondy kitaptar adamnyń ómir jasynyń uzaqtyǵyna qalaı áser etetinin zertteýdi qolǵa almaq. Nurhan SAMARHAN