Aq jeıde kıip kelińder, holı boıaýyn shashamyz!..

Aqsý qalasynyń 55 jyldyǵyna oraı Jastar bastama­laryn damytý ortalyǵy mereke kúnine qatysýshy­larǵa aldyn ala osyndaı habarlandyrý jasapty. Estimegen elde kóp. Sóıtip, úndilerdiń bir-birine holı boıaýyn shashý oıynyna Aqsýdaǵy merekede 400-ge jýyq adam qatysypty. Qaladaǵy «Jastar bastamalaryn damytý ortalyǵy» jeti tústi holı boıaýyn tipti, arnaıy tapsyryspen Almatydan aldyrypty. Bul ne?.. Úndilerdiń «Holı» mereke­si jaıly ınternet betterindegi ańyzdarda «holı» sóziniń «holıka» degen ázázildiń atyna baıla­nys­ty shyqqany aıtylady. «Ho­lı» úndilerdiń dinı festıvali. Bul kúni úndiler bir-birine túrli-tústi untaqtar laqtyryp oınap, naýryz aıynyń basynda úsh kún toılaıdy eken. Holıka perini jeńdik dep bir-birine boıaý shashady. Qala ákimdigi eshqandaı máde­nı-rýhanı baǵdarlamalar taba almaǵan ba, aqsýlyq jastar bir-birimizge holı boıaýyn shashyp oınasaq, 55 jyl­dyq mereıtoıda «Boıaýlar me­rekesi» barlyq qatysýshylardyń kóńil kúıin kóteredi depti. Ári boıaý­­lar qurǵaq, tez jýylyp, kıimde daq qaldyrmaıdy. Festıvalǵa qa­tysqysy keletinder aq jeıde kıip kelýi kerek eken. Al Aqsýdaǵy meshit ımamdary úndilerdiń boıaý shashý oıynynyń musylman balasy úshin tyıym salynǵanyn bilmeı me, sonda?! О́zge dinniń ózgesheliginen jastardyń boıyn aýlaq ustaý kerektigin eskertý kerek edi. Bir-biriniń bet-aýzyn túrli-tústi boıaýmen boıap, deneleri qyzyl-jasyl túske malynǵan jastar jyn qaqqandaı sendelip, qandaı bastamany damytyp júr, sonda? Bizdiń dinge, bizdiń dúnıetanymǵa, qazaqy bolmysqa, salt-dástúrge qatysy joq úrdistiń ómirimizge enteleı kirgeni jaqsy emes. Jastar kózderin asha almaı, qyzyldy-jasyldy qurǵaq boıaýǵa kómilip, elimizde qabyldanǵan Máńgilik El, Uly Dala eli ıdeıalaryn umyt qaldyrsa, bara-bara ne bolamyz?.. Iá, sóz joq, úndi eli – ǵajap el. Kınosyn bala kezden kórip, shaıyn iship óstik. Biraq, el aman, jurt tynyshta olardyń dinı meıramyn toılap, Aqsýdyń jastaryn ne qara basty eken?! Farıda BYQAI, «Egemen Qazaqstan» PAVLODAR