«...Jer satylady» degeni jalǵan

Alypsatarlyqqa ábden úırenip aldyq qoı. Tipti, bıznestiń ózin bir jer­den alyp, ekinshisine ústeme baǵa qo­syp satý dep uǵatyndar áli bar. Biraq bar ǵoı, munaı qory bar ken or­nyn tutasymen satamyn degen habar­landyrý oqımyz degen úsh uıyq­tasaq túsimizge kirmepti. «Júre berseń, kóre beresiń» deıtin támsilge súıensek, budan da zoryna kýá bolatyn sııaqtymyz. Olx.kz degen saıt bar. Jurt ózi paıdalanbaıtyn, biraq ustaýǵa jaramdy anaý-mynaý zattaryn sonda arzan baǵamen saýdaǵa shyǵarady. Kákúr-shúkirdiń arasynan «Buryn eshkim burǵylamaǵan, munaıyn ıgermegen ken ornyn satamyz. Baǵasy – 8 mıllıon dollar nemese 2 mıllıard 918 mıllıon 320 myń teńge. Biz ózimiz demeýshi izdep kórdik. Biraq eshkim tabylmady. Sondyqtan satý úshin jarnamalap otyrmyz. Jer «Qumkól» tasjolyndaǵy «Kazma» kompanııasynan 25 shaqyrym qashyqtyqta ornalasqan. Jerdiń kenishine barlaý jumystary Keńes Odaǵynyń tusynda júrgizilgen. Ol kezdegi qujattardyń bári qolymyzda bar. Jer jekemenshik ıe­liginde. Elektr qýaty men sý 25 sha­qy­rym qashyqtyqta. Bastysy, tas­­jol 30 shaqyrym, temirjol 175 sha­qy­­rym qa­shyq­tyqta ornalas­qan. Sa­typ alý­­shy tabylyp jatsa, sa­ta­myz, ınves­­tor tabylsa, aqyl­dasý­ǵa daıyn­byz», degen habar­lan­dyrý­dyń júr­geni jurtty kádimgideı dúr­lik­tirip tastady. Jarnama berýshi  Rýs­tam Ryspekov nys­pyly azamat eken. Bastapqyda, bireýdiń qaljyńy shyǵar degen edik. Degenmen, qajet­ti qujattarynyń bárin tirkep qoıǵan. Senbesińe bolmaıdy. «Jer ýchaskesine jekemenshik quqyn beretin aktiniń» kóshirmesin de salǵan. Ken orny ornalasqan tustyń kartasy da bederlengen. «Maqsat-Munaı Konsaltıng» deıtin mekemeniń de qujattary júr. Qysqasy, sendik. Sosyn oblystyq Jer qatynastary basqarmasyna habarlastyq. – Olx.kz saıtynda jarııalanǵan «Qyzylordada qoınaýy munaıǵa toly jer satylady» degen habarlandyrýdy birden zerttedik, – deıdi basqarma basshysy Shahmardan Qoı­shybaev. – Zerdeleı kele, ondaǵy jar­­namaǵa qoıylǵan aqparattyń shyn­­dyqqa janaspaıtyndyǵyn, ári jal­­ǵan ekendigin anyqtadyq. Birin­shi­­den, satýǵa qoıylǵan jerdiń 2014 jyl­dyń 7 qazanyndaǵy №384 nómirli tir­keýdegi jer aktisi Sultanbek Bı­mýr­zaev degen azamatqa berilgeni anyq­taldy. Ol ýchaske Syrdarııa aýda­ny, A.Toqmaǵanbetov aýyldyq ok­rýgi­­niń «Qarasor» aımaǵynan sharýa qo­ja­lyǵyn júrgizý úshin berilgen, ıaǵnı aýyl sharýashylyǵy maqsatyna paı­da­laný úshin kózdelgen. Bul jerdi ny­sa­naly paıdalaný maqsatynyń «munaı óndirýge» múlde qatysy joq. Ekin­shi­den, elimizdiń zańnamalaryna sáıkes jer ýchas­kesin munaı kenishi retinde paı­da­laný úshin eń aldymen mindetti túrde sa­lalyq mınıstrlikpen, atap aıt­qan­da Energetıka mınıstrligi ber­gen jer qoınaýyn paıdalanýǵa qatys­ty kelisimshart bolýy qajet. Ondaı kelisim bolmaı atalmysh jerde munaı óndirýge tyıym salynady. Basqarma basshysy habarlan­dyrý­dyń jalǵan ekenin naqty dáleldermen aıtty. Rýstam Rys­pekov­tiń munaı qory bar kenishti qolma-qol satamyn degeni ótirik bolyp shyqty. Bul – jarnama berýshiniń oıyny ma, álde basqa pıǵyly bar ma, ony quzyr­ly oryndar anyqtaýy kerek. Mem­le­ket­tiń baılyǵy sanalatyn ken oryndaryn alypsatarlyq saıttar arqyly satý dege­nińiz adamnyń kúlkisin keltir­gen­men, namysyńa da tıedi eken. Sondyq­tan, buǵan beıjaı qaraýǵa bolmaıdy. Erjan BAITILES, «Egemen Qazaqstan» Qyzylorda oblysy