Rıo – 2016: Dmıtrıı Balandın Olımpıada týraly

Elimizge alǵash ret júzýden Olımpıadanyń altyn medalin jeńip alǵan Dmıtrıı Balandın áli de óziniń chempıon bolǵanyn sezine almaı júrgenin aıtady. Osyny Rıo-de-Janeıroda Olımpıada chempıondary men júldegerlerine arnalǵan baspasóz máslıhatyna qatysqan «Egemen Qazaqstan» gazetiniń arnaýly tilshisi Baqtııar Taıjan aıtty. -Men qarsylastarymnyń qalaı júzip bara jatqanyn kórmedim. О́zime áli de tańqalyp otyrmyn. Maǵan Olımpıada chempıony bolǵanymdy seziný úshin 10 kún ýaqyt kerek shyǵar. Al qazir ózimdi sharshańqy sezinip júrmin. Qýanyshym qoınyma syımaı júr. Olımpıada ońaı bolǵan joq. Tańǵy saǵat 6-da bári uıyqtap jatqanda biz muzdaı sýda júzip júrdik. Biraq, tańnyń atysynan kúnniń batysyna deıin jattyǵyp, daıyndalǵanymyz túbinde nátıje berdi. Munyń bári elimiz úshin boldy. Eń bastysy, elimizdiń ánurany oınalyp, aspan tústi kók baıraǵymyz Olımpıada tórine shyǵyp, qalyqtady, – dedi ol. Olımpıada chempıonymen áńgimeni gazetimizdiń búgingi nomerinen oqı alasyzdar. Al bizdiń Olımpıadaǵa alǵash ret qatysyp, chempıon atanǵan Dmıtrıı Balandın týraly aıtarymyz, bul sportshymen 2014 jyly Ońtústik Koreıanyń Inchhon qalasynda ótken Jazǵy Azııa oıyndary kezinde áńgimelesen edik. Sol kezde ol Azıada chempıony atanyp, saryqurlyqtyń myqty degen júzgishterin moıyndatqan bolatyn. 19 jastaǵy jas jigittiń jarysyn Azııa qurlyǵynda aldyna qara saldyrmaıtyn japon júzgishteriniń jattyqtyrýshylary da bas barmaqpen baǵalaǵany esimde. Kúnshyǵys eliniń sýda júzýden bas jattyqtyrýshysynyń bir sózi de áli esimnen ketpeıdi. Ol Balandınniń kezekti jarysy kezinde bizdiń janymyzǵa kelip, «Osy jigittiń bolashaǵy bar. Ol Olımpıada chempıony bolady. Áli bárin moıyndatady», degen edi. Sol kezde ishimizden «Ámın» dedik.  Endi sol tilegimiz oryndalyp, Balandın Olımpıada chempıony atanyp otyr. Dastan KENJALIN Foto: twitter