Rıo-2016: О́zbekstan qazaǵy qola medalge qol jetkizdi

Rıo-de-Janeıroda ótip jatqan Olımpııalyq oıyndarda ózbekstandyq grek-rım palýany Elmurat Tasmuratov qola medal jeńip aldy. Qazaqstandyq Almat Kebisbaevpen bir salmaqta, 59 kıloǵa deıingiler qatarynda kúresken ol aqtyq synda qyrǵyzstandyq Arsen Eralıevti 3:1 etip tize búktirip, júldege qolyn jetkizdi. Ekinshi qola medal jubanysh raýndynda Kebisbaevty 2:0 etip utqan norveg Stıg Andre Bergege buıyrdy. Atap ótýimiz kerek, 25 jastaǵy Elmurat Tasmuratovtyń ulty qazaq. Ol Tashkent oblysynda týyp-ósken. 2004 jyly jasy 13-ke tolǵan kezinde ata-anasy ony arnaıy Qazaqstanǵa jiberedi. Jasóspirim sol kezden bastap Túrkistandaǵy Bekzat Sattarhanov atyndaǵy sport ınternatynda tórt jyl oqıdy. Internatty bitirgennen keıin Elmurat Qazaqstan quramasy sapyna enýge áreketter jasaıdy. Biraq 2008 jyly Dáýlet Turlyhanovtyń júldesi úshin ótkizilgen týrnırde jeńilip qalýyna baılanysty oǵan mundaı múmkindik berilmeıdi. Sondyqtan kóp uzamaı eline qaıtady. Sol ýaqyttan beri О́zbekstan týy astynda óner kórsetip, Azııanyń úsh dúrkin chempıony, álemniń eki márte qola júldegeri atandy. Qazir О́zbekstannyń olımpııalyq quramasy qorjynynda 1 altyn, 4 qola medal bar. Sonyń altyn júldesin boksshy Hasanboı Dýsmatov ákelse, qola medaldiń biri osy Elmurattyń enshisinde. Damır QOJAMQUL