Kásipkerliktegi kedergiler

Otandyq taýar óndirýshilerdi qoldaý úshin Almaty oblysy ákiminiń qaýlysymen óńirlik komıssııa qu­rylǵan edi. Oǵan oblys ákiminiń orynbasary Serik Turdalıev pen oblystyq kásipkerler palatasynyń dırektory Lázzat Shyńǵysbaeva teń tóraǵa bolyp bekitildi. Maqsaty  memlekettik organdar men otandyq taýar óndirýshilerdiń satý-satyp alý máselesine qoldaý kórsetip, kásipkerler qyzmetin úılestirý, memlekettik satyp alýdaǵy jergilikti quram úlesin arttyrý bolyp tabylady. Sonymen, atalǵan komıssııanyń jarty jyldyqty qorytyndylaǵan otyrysynda oblystyq qurylys basqarmasy 66 baıqaý, energetıka jáne turǵyn úı-kommýnaldyq sharýa­shylyq basqarmasy 61 baı­qaý ót­kizgeni habardar etilip, ká­sipkerlerge mem­lekettik satyp alý josparyn usyn­dy. Sondaı-aq, kásip­kerlerdiń de pikirleri men usy­­nys­tary tyńdaldy. Jobalyq-smetalyq qujattardaǵy tarıf mer­ziminiń ótip ketýi ózekti másele bolyp tur. Jobany maquldaýǵa, qar­jy­­landyrýǵa qujat ázirlengennen keıin qarjy bólý úrdisine 1 jyldan 3 jylǵa deıin ýaqyt ketetindigi anyq­taldy. Osy ýaqyt aralyǵynda taýar men qyzmet kórsetý baǵalarynyń qymbat­tap ketetindigi belgili. Alaı­da, satyp alýdy ótkizý kezinde memle­ket­tik organ qujatty ázirleý merzimin esepke almaıdy jáne úsh jyl buryn qoıylǵan tarıfti ózgertpeıdi. Al kásipkerdiń sol baǵamen kelispeske amaly joq. «Mundaı tapsyrysty birneshe ret oryndadym. Tehnıkalyq erekshe­likti daıyndaý barysynda maman­dar naryq jaǵdaıyna sáıkes kelmeı­tin taýar baǵalaryn kórsetedi. Al qyzmetter men taýarlar týraly aq­parat saıttardan alynady, ondaǵy málimetter birneshe jyldan beri jańartylmaǵan», deıdi «Galamat» jıhaz fabrıkasynyń dırektory Talas Meńsizbaev. Qoryta aıtqanda, ákimshilik keder­gilerdi sheshý úshin «Atameken» UKP men jergilikti atqarýshy organ­darǵa usynys-hat jiberiletin boldy. Nurbol ÁLDIBAEV, «Egemen Qazaqstan» TALDYQORǴAN