Gýbernatordyń habardar etýinshe, sý basýdan bassaýǵalaǵandar shtattyń ortalyǵy – Baton Rýh qalasyn panalaýda. Bul oqıǵadan AQSh bıligi de habardar bolǵan. Kómek berýge ázir ekenderin málimdedi. Federaldy úkimet shtattyń tórt bóligin sý basyp, onyń sońy apatty jaǵdaıǵa ulasqanyn aıtady. Bir aptaǵa jýyq tolassyz jaýǵan jaýyn osyǵan soqtyryp jatyr.
Qýatty jarylys avtobýsty otqa orady Sırııanyń Túrkııamen shekaralas aýdanynda jolaýshylar mingen avtobýs jarylyp, 15 adam qaza tapty jáne 25 jolaýshy jaralandy. Aldyn ala málimetter boıynsha, jarylǵysh qurylǵyny jankeshti iske qosqan. Avtobýsqa shabýyl Sırııadan Túrkııaǵa ótetin shekaradaǵy Atma ótkelinde jasalǵan. Keıbir málimetterge qaraǵanda, avtobýsta Sırııadaǵy azamattyq soǵysqa qatysyp jatqan toptyń jasaqtary otyrǵan sııaqty. Osynyń aldyndaǵy aqparatta órtengen avtobýstarǵa dárigerlerdiń kómektesip jatqany jarııalanǵan edi. Bul aqparat rastalmady. Atma ótkeli ornalasqan Sırııanyń Idlıb provınsııasy Túrkııa bıligi qoldaıtyn, prezıdent Bashar Asad úkimetine qarsy soǵysyp jatqan oppozısııalyq kúshter bekingen aımaq sanalady.
Utysyn alýǵa úlgermeı qalǵan Osy jyldyń naýryzynda ulttyq lotereıadan 6 mıllıon eýro utqan adam utysyn alýǵa úlgere almady. Brıýssel qalasynyń turǵyny óziniń utqan aqshasyn alýǵa tıisti merzim – senbi kúni de kelmegen eken. Utys ıesine izdeý salǵan ulttyq lotereıanyń ákimshiligi Belgııa gazetterinde úsh resmı tilde – fransýz, golland jáne nemis tilderinde habarlandyrý jarııalaǵan. Biraq, álgi adam qara kórsetpegen. Osynsha somadaǵy utys lotereıa bıleti 13 tamyzǵa deıin jaramdy bolatyn. Belgııada 2008 jylǵy jeltoqsanda da lotereıa jeńimpazy utysyn alýǵa kelmegen jaǵdaı tirkelipti. Bul elde eń iri utys – 100 mıllıon eýro 2007 jyly kezdesipti. Qysqa qaıyrǵanda:
- Qyrǵyzstan postkeńestik elder arasynda jas bosanǵan analar ólimi boıynsha birinshi orynda tur. Bul aqparatty Dúnıejúzilik densaýlyq saqtaý uıymy taratty.
- El kózine kóp túse bermeıtin Kýbanyń burynǵy basshysy Fıdel Kastro jurtshylyq aldyna shyǵyp, óziniń 90 jasqa tolǵan týǵan kúnin toılaý saltanatyna qatysty.
- Aýǵanstannyń soltústigindegi Qundyz provınsııasynda aýǵan armııasy «Talıban» qozǵalysynyń 21 múshesiniń kózin joıdy.
- Batýmı mańynda Qara teńizde alapat daýyl turyp, qutqarý qyzmeti 16 adamdy ajaldan qutqardy.
Kepildegi reseılik ushqysh bosatyldy Pákistan bıligi Islamabadta reseılik dıplomattarǵa buǵan deıin Aýǵanstanda «Talıban» qozǵalysy adamdarynyń qolyna túsip, keıin bosatylǵan Reseı ushqyshy Sergeı Sevastıanovty tapsyrdy. Reseılik telearnanyń habarlaýynsha, Reseı azamatynyń densaýlyǵy birqalypty dep baǵalanǵan. Buǵan deıin Reseı syrtqy ister mınıstrligi Sevastıanovty jaqyn kúnderi Reseı tarapyna tapsyratyny habarlanǵan edi. Bul ushqyshty О́zbekstan arqyly Reseıge tehnıkalyq qyzmetinen ótýge ushyp bara jatqanda, Pákistanǵa tıesili Mı-17 ushaǵy atyp túsirgen bolatyn. Al áskerı ushqyshty Aýǵanstannyń shyǵysyndaǵy Logar ýálaıatynda apatty jaǵdaıda qonýǵa májbúr bolǵanda tikushaqtaǵy ózge adamdarmen birge «Talıban» qozǵalysynyń kúsh qurylymdary kepilge alǵan.
Soltústik Koreıa AQSh-qa doq kórsetti Soltústik Koreıa AQSh-ty Azııa-Tynyq muhıty aımaǵynda arandatýshylyq áreketter jasaǵan jaǵdaıda áýe kúshterine ıadrolyq soqqy berýge ázir ekenin málimdedi. «Eskertý soqqysyn jasaý quqyǵy AQSh monopolııasy emes, – delingen habarlamada. – Koreı áskeriniń jedel bólimsheleri jaý tarapynan qandaıda bir arandatýshylyq baıqalsa, aıaýsyz soqqy berýge daıyn». Koreıa ortalyq telegraf agenttiginiń taratqan aqparaty boıynsha, Ońtústik Koreıa aýmaǵyna TNAAD amerıkalyq zenıtti zymyran kesheniniń batareıasyn ornalastyrý jáne Pentagonnyń Gýam araldaryna ıadrolyq qarý tasıtyn úsh strategııalyq bombalaýshy ushaǵyn jiberýi – KHDR aýmaǵyn qarýly basyp alý josparynyń bir bóligi. Osy jyldyń qańtary men aqpanynda bir márte ıadrolyq qarýdy synaqtan ótkizgen soń, Koreı túbegindegi jaǵdaı shıelenisip ketti.
Oqıǵa sońy tártipsizdikke soqtyrdy AQSh-tyń Vıskonsın shtatyndaǵy Mılýokı qalasynda afroamerıkalyq azamattyń polısııa oǵynan qaza tabýyna narazylyq bildirgen júzden astam adam kóshege shyǵyp, onyń sońy tártipsizdikke ulasty. Narazylyq bildirýshiler janarmaı quıý stansasyn, bank ǵımaraty men eki dúkendi órtegen. Tártipsizdik kezinde atys qarýyn da qoldanǵan sııaqty. Bir polısııa qyzmetkeri jaralandy degen derek bar. AQSh-ta afroamerıkalyqty atyp óltirý oqıǵasy jıi oryn alatyn boldy. Mysaly, osy oqıǵaǵa deıin Mılýokıde 23 jastaǵy afroamerıkalyq jigit polısııa qolynan qaza tapty. Munyń aldynda da AQSh-tyń birneshe qalasynda osyndaı jaǵdaı tirkeldi. Myńdaǵan adam qatysqan narazylyq sherýleri de ótti.
Internet materıaldary negizinde ázirlendi
