Bılet tabý beınet

Jol maqsaty – jetý. Endeshe, dittegen jerine jetý úshin kimde-kim bolmasyn qaltasyna qaraı qolaıly, tıimdi kólikti tańdaıdy. Jolaýshylar poıyzy da qolaıly kólikterdiń qatarynda. Qajetti jerińe jol qaýipsizdigine alańdamaı jatyp demalyp, áńgime kórigin qyzdyryp qalaı jetkenińdi ańǵarmaı qalasyń. Besikteı terbep, berekeńdi almaıtyn vagondar da yńǵaılylyǵyna qaraı joǵary jáne tómengi klastarǵa bólinedi. Jolaýshylar jazdyń qapyryq ystyǵynda jeldetkishteri bar salqyn kýpelerdi, kystyń saqyl­daǵan aıazynda jyly kýpelerdi tań­daıdy. Erterekte Almatynyń qaı vokzalyna barsańyz da aldyńyzdy orap, «Qaıda barasyz? Qansha bılet kerek» dep shaýyp júretin del­dal­dardan búginde arylǵan edik. Biraq endi bılet tappaıtyn kúı­ge jettik. Dostyq beketi – Qazaq­stannyń shyǵys qaqpasy. Bul el­di­ me­k­enge talqany shyqqan tas­jol­men jetý – qııamettiń qııameti. Dostyqtan Astanaǵa, Almatyǵa bılet alý matematıkalyq teń­deý­lerdi sheship, kýbık-rýbık­terdi qurastyrýdan da qıyn. Qıyn­datyp otyrǵandar da osy sa­lanyń qyzmetkerleri. Siz­den qujatyńyzdy jarty aı bu­ryn alsa da bılettiń tóbesin kór­meısiz. «Turan» jolaýshy­lar ta­symaldaý vagondary jekemen- shiktiń qolynda. Jazǵy maýsymda kúnara jıyrma vagonnan tirkeletin bul poıyzǵa bılet tabylmaıdy. Tabyla qalsa, jolserikter suraǵan baǵa tańdaıyńdy túsiredi. Aptasyna bir márte Astanadan – Úrimshige, Úrimshiden – Astanaǵa qatynaıtyn  bar. Almatydan osyndaı qurammen shyǵatyn jolaýshylar poıyzy Aqtoǵaı stansasynda toǵysyp, sol jerden eki baǵytqa bet alady. Úrimshiden qaıtyp Astana, Almaty baǵytyna tórt-tórtten bólingen segiz vagonda barlyǵy otyzǵa tarta jolaýshy otyrady. Sonda 250-ge tarta bos orynmen kele jatqan jolserikterdiń ózi keıde «aýa ákele jatyrmyz» dep kúle qaraıdy. Qadiri ketken halyqaralyq poıyzdyń múshkil jaǵdaıy osy. Al Dostyqtan Astanaǵa, Almatyǵa jete almaǵan júrginshiler jaǵdaıy múldem soraqy. Jańaǵy bos kele jatqan vagondaǵy orynǵa bılet ala almaısyz. Bılet kassasyndaǵylardyń aıtýynsha, qansha oryn bos ekeni jaıly málimet Astana men Almatydaǵy jol bólimi bıýro­larynan jetkizilip, odan soń Dostyq, Beskól, Aqtoǵaı, Saıaq kas­salarynyń jarysy bastalyp ketedi-mys. Bul jerde bıýro­daǵy­lardyń búıregi burǵandar moly­raq qamtıtyny aıdan anyq. Áli kúnge eski «Ekspress-21» bılet basý qurylǵysy turǵan Dos­tyqtaǵy kassır terip úl­ger­genshe, «Olıvettı» qurylǵy­syn quıyn­daı úıirgen ózge beket­te­giler mo­lynan qamtyp qalatyn kórinedi. Synyqtan syltaý izdep, birine biri siltegenshe halyqtyń pikirine qulaq asyp, aldymen alys bekettegilerdi qamtamasyz etip, sodan soń aralary úsh saǵatqa sozylatyn kelesi stansadaǵylardyń bılet kassasyn ashyp otyrsa, nur ústine nur bolar edi. Dostyqqa saparlap kelgender dittegen jerine jete almaı, aptalap bılet tospas edi. Qaıtken kúnde de qolaıly jaǵyn izdestirgen lázim. Bulaı bolmaǵan jaǵdaıda bıletti pysyqaılar alyp, qarapaıymdar qalyp, áljýazdar talyp, áli talaı jurtshylyqty áýre-sarsańǵa salmasyna kim kepil. Seıit OMAROV Dostyq beketi