Moratorıı merzimi uzartyldy

Elbasy Nursultan Nazarbaevtyń tóraǵalyǵymen eldiń áleýmettik-ekonomıkalyq damý qorytyndylary jáne Jer reformasy jónindegi komıssııanyń qyzmeti týraly keńes ótti, dep habarlady Prezıdenttiń baspasóz qyzmeti. Keńeske Premer-Mınıstr K.Másimov, Prezıdent Ákimshi­liginiń Basshysy Á.Jaqsybekov, Premer-Mınıstrdiń orynbasary – Aýyl sharýashylyǵy mınıstri A.Myrzahmetov, Pre­zıdenttiń kómekshisi – Qaýipsizdik Keńesiniń hatshysy N.Ermekbaev, Ulttyq ekonomıka mınıstri Q.Bıshimbaev qatysty. Is-shara barysynda Jer reformasy jónindegi komıssııanyń jumys qorytyndylary talqy­lanyp, jer zańnamasynyń ó­z­ge­ris­terine moratorııdi 5 jyl­ǵa uzartý týraly sheshim qabyl­dandy. – Jer kodeksiniń birqatar normalaryna moratorıı engizil­gen kezden bastap komıssııa ma­ńyzdy jumys júrgizdi, eldiń barlyq óńirinde keńes ótkizip, azamattardyń pikirin tyńdady. Jumys barysynda olar jaqsy usynystar aıtty, atap aıtqanda, jalǵa beretin telimderdiń shekti kólemin, jerdi paıdalaný tásilderi men ony tıimsiz paıdalanǵan jaǵdaıda qabyldanatyn sharalardy anyqtaý týraly usynystar engizildi. Osylaısha, bári jerdi 49 jylǵa deıin jalǵa berý ınstıtýtyn saqtaý qajet degen ortaq sheshimge keldi. Sonymen birge, álemdik tájirıbeni taǵy da zerttep, qosymsha ýaqyt qajet ekeni týraly turǵyndarǵa biliktilikpen túsindirý kerek. Sondyqtan Komıs­sııanyń moratorııdi taǵy 5 jylǵa uzartý týraly usynysyn qabyldaımyn, – dedi Nursultan Nazarbaev. Sondaı-aq, Qazaqstan Pre­zıdenti Úkimettiń jer zańna­ma­syna ózgerister engizý týra­ly sheshim qabyldaǵan kezde agroónerkásip salasyna qarajat tartý maqsatyn basshylyqqa alǵanyn atap ótti. – Aýyldyq jerlerde halyq­tyń shamamen 40 paıyzy turyp jatyr, 20 paıyzy aýylda eńbek ete­di. Aýyl sharýashylyǵyn ór­ken­­detý kóptegen salalardyń damýy­na septigin tıgizedi. Aýyl sharýashylyǵymen aınaly­sa­tyndardyń barlyǵy bul salaǵa qoldaý kórsetý úshin memlekettiń qandaı kúsh-jiger jumsaǵa­nyn jaqsy biledi. Jyl saıyn agrarlyq sektorǵa aıtarlyqtaı qarajat jumsalady, biraq ol ózin aqtaı bermeıdi. Naryqtyq ekonomıkada olaı bolmaıdy. Munyń sebebi, aýyl sharýashylyǵyndaǵy eńbek ónimdiliginiń tómendiginde jatyr, al ony arttyrý úshin qosym­sha qarajat salý kerek. Búkil álem agrarlyq sektorǵa ınves­tısııa tartý isimen aınalysýda. Bizdiń memleketimiz de aýyl sharýashylyǵyn damytý úshin kóbirek kapıtal tartýdy qalady. Eger bul jumys túsindirýden bastalyp, tek sodan soń ǵana zańdar qabyldansa, onda ahýal basqa bolar edi, – dedi Memleket basshysy. Budan bólek, keńeste respýblı­kanyń áleýmettik-ekonomıkalyq damýynyń negizgi máseleleri, memlekettik baǵdarlamalardyń oryndalý barysy jáne aldaǵy kezeńge arnalǵan josparlar qaras­tyryldy. – Eldiń ekonomıkalyq damýy álemde bolyp jatqan úderis­ter saldarynan zor qysym kórip otyr. Qazirgi qarjylyq-eko­nomıkalyq daǵdarys, sandyq ekonomıkanyń jańa paradıgmasyna kóshý bizden múlde jańa qadamdar talap etedi. Biz sony taba bilýimiz kerek, bul úshin elde resýrstar jetkilikti, – dedi Nursultan Nazarbaev. О́z baıandamasynda A.Myr­­zah­metov Memleket basshysynyń tapsyrmasymen qurylǵan  komıssııa Astanada, sondaı-aq birqatar óńirde jurtshylyqtyń qatysýymen kóshpeli otyrys ótkizgenin aıtty. – Azamattardyń aryz-shaǵym­dary úshin arnaýly saıt ashylyp, call-ortalyqtar quryldy, búginde olarǵa 13 myńnan as­tam telefon qońyraýy túsken. Túsindirý jumystary barysynda jurtshylyqty baryn­sha keńirek qamtý úshin ákimdik­ter janyndaǵy qoǵamdyq keńes­ter iske tartyldy, halyqtyń 67 myń ókilimen kezdesý ótti, – dedi Premer-Mınıstrdiń orynbasary – Aýyl sharýashylyǵy mınıstri. A.Myrzahmetov komıssııanyń negizgi usynystary, sonyń ishinde aýyl sharýashylyǵy jerin jalǵa berý ınstıtýtyn saqtap, odan ári damytý, jalǵa beriletin jer telimderiniń shekti kólemin belgi­leý qajettigi jóninde de aıtty. Sondaı-aq, halyqtyń jaıylymdar men shabyndyq jerlerge qatysty múddesi men talaptaryn eskerý kerektigi, jeke turǵyn úı salý úshin jer berýdiń naqty erejeleri men tetikterin anyqtaý qajettigi atalyp ótti. Memleket basshysy keńes qory­tyndysy boıynsha birqatar tapsyrma berdi. Sýret Prezıdenttiń baspasóz qyzmetinen alyndy