Rıo-de-Janeıro Olımpııalyq oıyndaryndaǵy on birinshi jarys kúni Qazaqstan quramasy qorjynyna 1 altyn, 1 qola medal qosyldy. Altyn júldeni bizdiń altyn aıdarly ardaqty ulymyz, bokstan Qazaqstan quramasynyń kapıtany, astanalyq Danııar Eleýsinov ózbek boksshysy Shahram Ǵııasovpen shaıqasta jeńip aldy. Osylaısha ol qazaq boksshylarynyń Olımpıadanyń 69 kıloǵa deıingi salmaqtaǵy altyn medalin qatarynan tórtinshi márte jeńip alýyn qamtamasyz etti. Danııar 2004 jyly Afınada ótken Olımpııalyq oıyndarda Baqtııar Artaev negizin qalaǵan, keıin 2008 jyly Beıjińde Baqyt Sársekbaev, 2012 jyly Londonda Serik Sápıev jalǵastyrǵan úlgili úrdisti odan ári ulastyra bildi. Bul – Olımpııalyq oıyndardyń tarıhynda buryn-sońdy kezdespegen kórsetkish. Danııar sonymen birge, Serik Sápıevten keıingi bizdiń álem chempıondyǵy ataǵyn Olımp shyńyna shyǵýmen jalǵastyra bilgen ekinshi boksshymyz.
Keshegi kúnniń taǵy bir qýanyshy – qaraǵandylyq balýan Elmıra Syzdyqova qola medal aldy. Sóıtip, qazaq qyzdary arasynan Olımpııalyq oıyndar tarıhynda onyń júldeli tuǵyryna kóterilgen birinshi qyz atandy. Sondaı-aq, Elmıranyń elimiz qoryna Olımpıadanyń 12-shi medali bolyp engen júldesiniń taǵy bir salmaqty jaǵy bar. Ol Qazaqstan sportshylarynyń bul joly Olımpııalyq oıyndarda alǵan jıyntyq medaldary sanynyń da asyp túskeli turǵanyn kórsetip berdi. Ázirge ol 12-shi bolyp turǵanymen, áli qandaı tústi bolatyndary ajyratylmaǵan Ádilbektiń, Ivannyń jáne Darıǵanyń nagradalaryn qosqanda 15-inshi bolyp shyǵa keledi. Al bizdiń buǵan deıingi eń úzdik kórsetkishterimiz Beıjiń men Londonda alǵan 13 medal bolatyn.
Keshe túnde sharshy alańǵa boksshy Ádilbek Nııazymbetov te shyqty. Ol 81 kıloǵa deıingi salmaqtyń altyn medalin kýbalyq Hýlıo Sezar La Krýzben sarapqa saldy. Buǵan deıin bul qarsylastar eki ret – 2011 jyly Bakýde, 2013 jyly Almatyda ótken álem chempıonattarynyń fınalynda kezdesken edi. Bul joly taǵy da fınaldyq kezeńde qolǵap túıistirip otyr. Alaıda jan berip, jan alysqan jekpe-jek nátıjesi taǵy da Hýlıo Sezordyń paıdasyna sheshildi. Sóıtip, Ádilbek kezekti kúmisin qanaǵat tutty.
Sýretti túsirgen Danııar MAILYBAEV
