Daralanǵan Danııar

el senimin aqtap, chempıon atandy Keshe gazetimizde Olımpıadanyń bir kúnin qorytyndylap bergen maqalamyzda boksshylar Danııar Eleýsinov pen Ádilbek Nııazym­betovtiń fınalǵa shyqqanyna qýanysh bildirgenbiz. Sol Danııar keshe erledi. Jalpy, onyń qubylys eken­digi London Olımpıadasynda aıtylǵan edi. Belgili boks mamany Iýrıı Shaı: «Dúnıe júzinen jınalǵan boks mamandarynyń arasynda búgingi myqty qolǵap sheberleri týraly kóp áńgime bolady. Sonda olar Danııar Eleýsinov týraly erekshe pikir bildiredi. Qazirgi boks kásipqoılardyń tóbe­lesine uqsap barady. Eleýsinov boks­tyń uly óner, úlken mádenıet eken­digin óziniń urys mánerimen dálel­degen dara boksshy, ol uzaqqa bara­dy», dep bizdi qýantqan. Biraq, sol joly aǵasy Serik Sápıev altyn­­nan olja saldy. Vel Barker Kýbo­gin elge ákeldi. Biz Danııardyń jul­dyz­dy sátin kúttik. Tek qasyn­daǵy boks­shylar ǵana emes, búkil el sendi. Búgin sol úmit aqtaldy. Rıo Olım­pıadasynyń 69 kılo salmaq­qa dep arnaıy soqqan som altyn medali bizdiń batyr jigittiń qolynda. Biraq altyn júlde ońaı berilgen joq. Jartylaı fınalda qarsylasynyń basy kezdeısoq tıip, qabaǵy jaraqattanyp qalǵan edi. Keshirek bas jattyqtyrýshyǵa habar­las­qanymyzda: «Eki jerden tiktirdik. Jaraqaty aýyr, dárigerlerden qaýiptenip otyrmyz. Áıtpese, Danııar tas-túıin daıyn», – degen. Qarsylasy ózbekstandyq Shahram Gııasov – óte myqty boks­shy. Soqqysy aýyr. Fınalǵa deıin talaı myqtynyń keýdesin basty, jarys jolynan shyǵaryp tastady. «Altynnyń» sheti kórinip turǵanda, janyn nege aıasyn! Onyń ústine, Eleýsinovtiń aýyr jaraqaty bar, dál sol jerden ura berse, dárigerler jarystan alyp tastaıdy ǵoı. Ishinde taǵy basqa qandaı qııal bolǵanyn bilmesek te oıyn osylaı jobaladyq. Solaı bolyp shyqty. Shahram­nyń jaqynnan urys salǵanda, sol jaraqatqa qatty urýdy kózdep júrgeni belgili boldy. Áıtpese, ońaılyqpen soqqy darytpaıtyn Danııar shegine urys salyp shaldyrmaı ketedi. Shahramdy bul úshin jazǵyra almaısyń. Bapkeriniń de tańǵan taktıkasy osy. Danııar óte sezimtal, qarsylasynyń urǵan soqqysynyń qaı shamaǵa jetetinine deıin shaıqasyp júrip, eseptep úlgeredi. Shahramnyń dóp tıse, atan ógizdi murttaı ushyratyn soqqy­lary Danııardyń ıegine ıneniń jasýyndaı qashyqtyqta tımeı jatty. Negizinde, Danııardyń sheginip urys salýy qarsylasynan qaımyǵý emes, aýyr soqqylarǵa shaldyrmaıtyn taktıkalyq qarýy. Qandaıda myqty qarsylas bolsyn, mundaı bopsaǵa shydaı almaı, jipteı tartylyp turǵan júıkesi syr bere bastaıdy. Soqqylardan jaltaryp qana qoımaı, ózi aýyr judyryqtarmen kómip tastaıtyn Danııarǵa esesi ketken Shahram órshelene alǵa umtyldy. Ekeýi de bylaıǵy ómirde syılas bolǵanymen, ózi úshin de, ózine sengen halqy úshin de ólispeı berispeıtin urys salyp júr. Sońǵy raýndta Shahram jeńilip jatqanyn sezip, bar kúshin saldy. Bizdiń jigit synaptaı syrǵyp, jetkizbeı júr. Janasqan sátte qoly almas qylyshtaı jarq ete qalady. Kúmán­siz jeńdi: úsh tóre­shi de Danııar jeńdi dep tanyǵan. Sóıtip, Danııardyń ǵana emes, bizdiń de armanymyz oryndaldy. Kópten beri qabaǵy jaýar bult­­­taı túnerip júrgen bas jat­tyq­tyrýshy Myrzaǵalı Aıt­janov­tyń da ashýy basylypty. Biz búgin­gi jekpe-jektiń túıinin tarqa­tý­dyń mánisin suradyq. – Danııar Eleýsinov – komanda kapıtany bolǵandyqtan, oǵan artylǵan jaýapkershilik júgi aýyr, – dedi ol. – Sondyqtan, ta­ńer­­­teń­gilik komandanyń barlyq múshe­­si jınalyp, Danııardyń atyna salmaqty sózder aıtty. Olar Eleýsinovtiń qarsylasynan myqty ekendigi, Gııasovpen qalaı aıqas ótkizýdiń joldary tarazylanyp, barlyǵy úshin kapıtan jeńiske jetýi kerek degen júrekjardy tilekter bildirdi. Bizdiń boks sporty tarıhynda álem chempıonynyń Olımpııalyq oıyndar chempıony bolýyn Serik Sápıev bastap berip edi. Odan keıin, mine, Danııar osy jetistikti qaıtalap otyr. Shahram da jigittiń tóresi eken. Bas­­pasóz kon­­fe­ren­­­sııa­synda Da­nııarǵa úlken qurmet­pen qaraı­tyn­­dyǵyn aıtty. «Bul óte myq­ty jekpe-jek boldy. Úshinshi raýndta kúshim jetpeı qal­dy. Biraq, kim qalaı dese de biz túbi bir týysqan halyq­pyz, sondyq­tan týys­qan qazaq halqyn taǵy bir alty­ny­men qut­tyqtaımyn», dedi. Osylaısha taǵy bir jaqsy kún artta qaldy. Bul kúni tamasha jetis­tik­terge qol jetkizgen balýanymyz El­mıra Syzdyqova qola medal­dyń aýylyna at oınatyp keldi. «Egemen Qazaqstannyń»  arnaýly tilshisi Baqtııar TAIJAN Rıo-de-Janeırodan habarlaıdy Sýretti túsirgen Danııar MAILYBAEV