«Jasyl» energetıkany damytý úderisi

Ońtústik-Shyǵys Azııaǵa jasaǵan jumys sapary barysynda EKSPO-2017 halyqaralyq mamandandyrylǵan kórme komıssary Rápil Joshybaev Sıngapýrde araldyq memlekettiń EKSPO-2017 kórmesine qatysýyna jaýapty Ulttyq seksııanyń komıssary – Saýda jáne ındýstrııa mınıstrligi departamentiniń dırektory Vong Týn Djýnmen jáne Sıngapýr týrıstik agenttigi ulttyq assosıasııasynyń prezıdenti Devınder Orımen kezdesti. Kezdesý barysynda Rápil Joshybaev pen Vong Týn Djýn eki el arasyndaǵy saýda-ınvestısııalyq jáne ǵylymı yntymaqtastyq máselelerin talqylady. Onyń ishinde «jasyl» tehnologııa salasyn­daǵy jetistikter jan-jaqty tilge tıek etilip, Sıngapýr kom­panııalarynyń Astanadaǵy kórmege qatysý múmkindigi tal­qy­landy. Sıngapýr komıssary bul elde «jasyl» energetıkany damytýǵa aıryqsha mán beriletindigin aıta kelip, salany damytýǵa memleket bıýdjetinen 3,4 mıllıard AQSh dollary kóleminde qarjy bólingendigin atap kórsetti. Búginde jańǵyr­maly energııa kózderi arqyly alynatyn energetıka salasynda 18 myń adam jumyspen qamtylǵan. Ol sonymen birge, Astanada ótkiziletin EKSPO kórmesiniń bul mańyzdy salaǵa jańa tehnologııalar tartýǵa, ǵylymı bazany nyǵaıtýǵa jáne Qazaqstannyń halyqaralyq dárejedegi bedeliniń artýyna yqpal etetindigin aıtty. Kezdesý qorytyndysynda R.Joshybaev pen Vong Týn Djýn EKSPO-2017 halyqaralyq maman­dandyrylǵan kórmesine sınga­pýrlik taraptyń qatysa­tyn­­dy­ǵy jónindegi shartqa qol qoıdy. Sıngapýr týrıstik agenttigi ulttyq assosıasııasynyń pre­zı­denti Devınder Orımen ótkizilgen kezdesý sheńberinde taraptar sın­gapýrlik týrısterdi elordada ótetin kórmege kóptep tartý máselelerin talqylady. Bul rette eki eldiń týroperatorlary kór­mege satylatyn bıletterdi tara­tý máselesi jóninde jan-jaqty jumys júrgizýi kerek. Devın­der Orı Astanada ótetin kórme sheńberinde sıngapýrlik týrıs­terdi Qazaqstanǵa kóptep tartý máselesiniń ońtaıy kelip turǵan­dyǵyn atap kórsetti. Sonymen birge, R.Joshybaev Sın­gapýrde ótip jatqan jyl saıyn­ǵy «NATAS Travel Fair 2016» halyqaralyq týrıstik kórmesine qatysty. Osy kórme aıasynda uıym­dastyrylǵan Qazaqstan pavılo­nynyń jumysymen tanysyp, sıngapýrlikterge qazaqstandyq týrıstik áleýettiń múmkindikterin pash etti. Ulan SANJAR