Rıo-2016: Kilemge Erlanbek Káteıuly shyǵady

Búgin Olımpıadaǵa Qytaıdyń atynan qatysyp jatqan qandasymyz Erlanbek Káteıuly bozkilemge shyǵady. Ol erkin kúres beldesýinde 65 kıloǵa deıingi salmaqta kúsh synasady. Erlanbek Olımpıadaǵa alǵash ret qatysyp jatyr. Buǵan deıin álem, Azııa chempıonattaryna qatyssa da tórt jylda bir keletin dúbirli dodaǵa áli qatysyp kórmegen. Ol Olımpıadaǵa lısenzııany  bıyl Astanada ótken halyqaralyq týrnırde jeńip alǵan. Erlanbek Káteıuly kópbalaly otbasydan shyqqan. Ol Altaı okrýgynyń Qyzyltas aýylanda týǵan. Otbasynda alty balanyń kenjesi. Qazir ol ákesimen jáne baýyrlarymen Lıanchjoý qalasynda turady. Onyń sheshesi eki jyl buryn qaıtys bolǵan. Balýan jigit kúreske kesh barǵan eken. "Eshten kesh jaqsy" demekshi,  kúres zalynyń tabaldyryǵyn kesh attasa da 2010 jyly erkin kúresten Qytaı chempıony atanǵan. Sol kezde kózge túsip, ulttyq quramaǵa alynǵan. Qazir Erlanbek Qytaı komandasynyń beldi múshesi. Olımpıadaǵa alǵash ret qatysyp jatsa da júldeden dámeli ekenin jasyrmaıdy. Sonymen birge elishilik jarystardy umytpaıdy.  Mysaly, onyń Qytaıda Olımpıadada keıin jalaýyn kóteretin Spartakıadada top jarsam degen tátti tilegi bar eken. -Olımpıadadan keıin Qytaıda Spartakıada ótedi. Bul jarys Qytaıda máni men mańyzy jaǵynan Olımpıadadan keıin ekinshi úlken doda. Osy jarysqa da  qatysyp, baq synasyp kóremin, - deıdi Erlanbek. Al ázirge balýannyń bar oıy - Olımpıada. Onyń osy dodada myńnan tulpar, júzden júırik júldegerlerdiń qatarynan tóbe kórsetsem degen armany jáne bar. Jeńiske degen jigeri kózinen kórinip turatyn jas jigit ony eshqashan eshkimnen jasyryp kórgen emes. Dastan KENJALIN Foto: facebook.com