Rıo-2016: О́zbekter taǵy eki altyn medal jeńip aldy

Rıo-de-Janeıroda ótip jatqan Olımpııalyq oıyndardyń boksshylar básekesi búgin túnde úsh fınaldyq jekpe-jek oınalýymen óziniń máresine jetti. Ondaǵy alǵashqy eki urysta ózbek boksshylary rıngke shyǵyp, ekeýi de jeńiske jetti. Aldymen 52 kıloǵa deıingi salmaqta Shahobıdın Zoırov reseılik Mısha Aloıandy 3:0 etip utty. Jekpe-jektiń birinshi raýndynda Aloıan basym bolǵanymen, kelesi eki raýndta tizgindi qarsylasyna berip qoıdy. 64 kıloǵa deıingi salmaqtaǵy Fazlıddın Gaıbnazarov ta tegi kýbalyq Ázerbaıjan ókili Lorenso Kollazo Sotomaıormen shaıqasynyń basynda 0:3 bolyp jeńilip jatty. Kelesi eki raýndta 2:1 etip alǵa shyqqan oǵan qorytyndyda jeńis te berildi. Sóıtip, buǵan deıin 49 kıloǵa deıingi salmaqtaǵy Hasanboı Dýsmatovtyń altyn medalimen birge О́zbekstan boksshylary eń joǵary nagrada sanyn úsheýge jetkizip, Kýbadan basyp ozdy. Eń sońǵy 91 kılodan aýyr salmaqta fransııalyq Djeıms Tonı Vıktor Ioko men brıtanııalyq Djoı Djoıs altyn medal úshin talasty. Onda fransýz boksshysynyń desi basym shyqty. Boksshylardyń komandalyq esebinde 3 altyn, 2 kúmis, 2 qola medal jeńip alǵan О́zbekstan quramasy birinshi orynǵa shyqty. Ekinshi oryndaǵy Kýbada 3 altyn, 3 qola medal bar. Úshinshi orynǵa 1 altyn, 2 kúmis, 1 qola medalmen Qazaqstan boksshylary ornalasty. Al tórtinshi-besinshi oryndarǵa 1 altyn, 1 kúmis, 2 qola medaldy Reseı jáne Fransııa komandalary qatar jaıǵasty. Altynshy oryndy 1 ǵana altyn medalge qol artqan Brazılııa jamaǵaty enshiledi. Osymen Oıyndardyń boks týrnıri óziniń máresine jetti. Damır QOJAMQUL