Búgin túnde Astanaǵa Rıo-de-Janeıro qalasynda ótken jazǵy Olımpııa oıyndarynan oljaly oralǵan sportshylarymyz keldi.
Olardy Astananyń halyqaralyq áýejaıynda qala halqy erekshe qurmetpen, sán-saltanatpen qarsy aldy. Áýejaıǵa jınalǵan jurtshylyq elimizdiń kók baıraǵyn jelbiretip, «Alǵa, Qazaqstan!» dep urandatyp, sportshylar men jattyqtyrýshylarǵa qurmet kórsetti.
Saltanatty sharada Astana qalasynyń ákimi Áset Isekeshev Olımpıadadan kelgen Qazaqstannyń bokstan, erkin kúres pen áıelder kúresinen ulttyq qurama komandasyn quttyqtady. Ol sahna tórine shyǵyp, elimizge tórt jylda bir keletin dodadan jeńis týyn ákelgen Olımpıada chempıony Danııar Eleýsinov, kúmis júldegerler Vasılıı Levıt, Ádilbek Nııazymbetov, Gúzel Manıýrova, qola júldegerler Ivan Dychko, Darıǵa Shákimova, Elmıra Syzdyqova, Ekaterına Larıonova men olardyń jattyqtyrýshylaryna qarata sóz sóılep, Olımpıadadaǵy jeńisteriniń mańyzdylyǵyn atap ótti.
«Olımpıadadan oralǵan sportshylarymyzdy osynda jınalǵan kópshiliktiń atynan shyn júrekten quttyqtaımyn. Sizder jarysta halqymyzdyń jáne osy jerge arnaıy kelgen aǵaıynnyń senimin aqtadyńyzdar. Osy sahnada turǵan árqaısyńyz elimizdiń namysyn qorǵadyńyzdar. Sizder biz úshin elimizdiń naǵyz batyrlarysyzdar. Olımpıada kezinde búkil el sizderge jankúıer boldy. Qazir ony aıtyp jetkizý múmkin emes. Olımpıada - jarystardyń jarysy, tóresi. Osy dodada laıyqty óner kórsetken sizdermen biz árqashan maqtanamyz», dedi ol.
Odan ári qala ákimi olımpıadashylardyń jeńisi myńdaǵan jas jigitter ben qyzdardyń sportqa degen qyzyǵýshylyqtaryn oıatqanyn, endi elimizde Olımpıada shyńyna shyǵýdy armandaıtyn, sony ómirlik maqsaty etip aldyna qoıatyn jasóspirimderdiń sany kóbeıetinin, osynyń barlyǵy Memleket basshysy Nursultan Nazarbaevtyń halyq arasynda salamatty ómir saltyn qalyptastyrýda, buqaralyq jáne kásibı sportty damytýda júrgizip jatqan syndarly, salıqaly saıasatynyń arqasynda múmkin bolyp otyrǵanyn atap ótti. Osy jerde Astana ákimi Vasılıı Levıttiń júldesine toqtalyp, onyń kúmis medali biz úshin altyn júlde bolatynyn, ol halqymyzdyń júreginde Olımpıada chempıony bolyp qala beretinin jetkizdi.
«Vasılıı Levıt, bilesiń be, biz seni Olımpıada chempıony dep sanaımyz. О́mirde bári bolady. Seniń aldyńda áli keremet jeńister bolatynyna senimdimin! Sen biz úshin – chempıonsyń!», dedi ol.
Osydan keıin qala ákimi qalyptasqan dástúr boıynsha Olımpıada chempıony men júldegerleri memleket tarapynan marapattalatynyn, olarǵa tıisti syıaqy men Astanadan páterdiń beriletinin aıtty. Osyǵan baılanysty qala ákimi syı-qurmettiń basy retinde boksshy Danııar Eleýsinov, Vasılıı Levıt pen kúres sheberi Gúzel Manıýrovaǵa «Djıp» kóliginiń kiltin tabys etti.
Saltanatty sharada sportshylar ózderine qoldaý kórsetken aǵaıynǵa alǵys sezimderin bildirdi. Onda Danııar Eleýsinov, Gúzel Manıýrova men Vasılıı Levıttiń anasy Tatıana Levıt sahna ortasyna shyǵyp, elimizde sportty damytýǵa barlyq jaǵdaı jasap jatqan Memleket basshysyna, Astanada qala ákimine, ózderin jarysqa daıyndaǵan jeke jattyqtyrýshylaryna, komandanyń bas jattyqtyrýshysyna, bapkerler shtabyna alǵystaryn jetkizdi.
«Biz Muxıttyń arǵy jaǵynda bolsaq ta, xalyqtyń qoldaýyn sezindik. Jeńiske jetýge jaǵdaı jasap otyrǵan Elbasymyzǵa myń da bir alǵys! Bizdiń jeńisimizdiń barlyǵy jattyqtyrýshylardyń arqasy. Olardyń eńbegi óte zor. Sol jattyqtyrýshylaryma alǵysymdy bildirgim keledi. Jeke bapkerim – ákeme, komandanyń bas jattyqtyrýshysyna, basqa da bapkerlerge alǵysym sheksiz. Sportshyny jarysqa daıyndaýda massajıst, dárigerler men bıohımıkterdiń de eńbegi zor. Osy azamattardyń eńbegi kóp. Biz Olımpıadada jankúıerler men osy kisilerdiń qoldaýymen jeńiske jettik. Sizderdi qýantqanyma, armanyma jetkenime óte qýanyshtymyn!», dedi Danııar Eleýsinov.
Olımpıadanyń kúmis júldegeri Gúzel Manıýrova da jankúıerlerge alǵysyn bildirdi. Ol júregi tolqyp, tebirenip, medaldi halyqtyń qoldaýynyń arqasynda jeńip alǵanyn aıtty. Al Vasılıı Levıttiń anasy árbir chempıonnyń artynda myqty ana men myqty jattyqtyrýshynyń, rýhy myqty halyqtyń turatynyn, Qazaqstan sekildi Uly elde turyp jatqan árbir adam árqashan da memlekettiń qoldaýyna ıe bolyp jatqanyn aıtyp, balasynyń Olımpıadanyń bıik shyńyna shyǵýyna barlyq jankúıerdiń úlesi bar ekenin atap ótti. Osylaı deı kelip, Tatıana Levıt halyqqa ystyq yqylasy úshin basyn ıip, qurmet kórsetti.
Saltanatty shara aıaqtalysymen sportshylar júzderi bal-bul janǵan balalarmen estelik sýretke túsip, jankúıerlermen jarys týraly syrlasyp, elge degen saǵynyshtaryn bir tarqatty.
Dastan KENJALIN
Foto: Erlan OMAROV
