Temirdi jeńgen Tolaǵaı

Rıo Olımpıadasynan el qorjynyna alǵashqy altyn medaldi salǵan Nıdjat Rahımovtyń balalyq shaǵy Baký qalasynda ótken. Ákesi Álı de sportshy, aýyr atletıkanyń qyr-syryn bir kisideı biledi. Sol sebepten de bolar, Nıdjatty bala kúninen qolynan jetelep, aýyr atletter jattyǵatyn zalǵa jıi ertip barypty. Osylaısha buǵanasy qata qoımaǵan kezden, ziltemirdi dopsha kótergen aýyr atletterdiń ár qımylyna tamsanýdan talmaǵan ul óz ańsarynyń osy sportqa aýǵanyn baıqamaı qalypty. Qazaq eli ony qushaq jaıa qarsy aldy. Túbi bir túrki eliniń ókili Nıdjat ta bul jaqty jatsynbady. Atyraýdaı munaıly óńir­diń tabıǵaty qataldaý bolǵanymen, ony tur­ǵyndarynyń qazaqtyń keń dalasyndaı darhan kóńili jigerlendirdi. Jergilikti bılik jańadan boı kótergen kóp qabatty úıden baspana berdi. Sport mamandary qoldaýyn kórsetti. Tahır Halmatovtaı halyqaralyq dárejedegi sport sheberi qamqorlyǵyna alyp, halyqaralyq saıystarǵa daıyndaı bastady. Qazaq eliniń, qazaq halqynyń darhan kóńilinen janyna medet tapqan Nıdjat ta kóp uzamaı babyna keldi. О́z salmaǵy – 77 kıloda el chempıonatynda top bastady. Sosyn, Hıýstonda jalaýy  jelbiregen álem chempıonatynda oǵan teńeser qarsylas tabyla qoımady. Bul onyń qazaq eli týy astyndaǵy alǵashqy jeńisi bolatyn. Meniń bir ǵana qarsylasym bar, ol – tek ziltemir dep málim etip edi Hıýstondaǵy álem chempıonatynan keıin Nıdjat Rahımov. Ol Rıo Olımpıadasyndaǵy ekinshi jatty­ǵýynda táýekelge bardy. Aldyńǵy baǵyn­dy­rylǵan belesten 12 kıloǵa aýyr salmaqqa tapsyrys berdi. 214 kılo! Bul salmaqty aqyrynda tóbesine tik kóterip áketti. Rekord! Chempıon da bolyp shyǵa keldi. Qazaqstan qorjynyna alǵashqy altyn medal osylaı tústi. Qazaq eliniń daladaı darhan kóńiliniń meıirimi men ystyq yqylasyna bólengen Nıdjat Rahımov endi azamattyǵyn aýystyrmaýǵa bekinip otyr. «Maǵan azamattyǵyn berip, Olımpıada chempıony bolýyma jol ashqan Qazaq eli, ózim turyp jatqan Atyraý oblysy unady. Men endi Qazaqstannan eshqaıda ketpeımin. Budan bylaı da Qazaqstannyń atynan halyqaralyq dodalarǵa qatysa beremin. Meniń basty armanym – ózim turyp jatqan eldiń abyroıyn, mereıin tasyta berý!», – dedi ol. Joldasbek ShО́PEǴUL, «Egemen Qazaqstan» ATYRAÝ