Kóne túrki eskertkishterin zertteýge múmkindikter molaıa tústi

Ulan-Batyr qalasynda Halyqaralyq Túrki akademııasynyń (TWESCO), Mońǵolııa ǵylym akademııasynyń jáne «Egemen Qazaqstan» respýblıkalyq gazetiniń uıymdastyrýymen ótip jatqan «Táńirtaýdan О́túkenge deıin: Uly Dala kóshpendileriniń tarıhı-mádenı qazynalary» atty II halyqaralyq ekspedısııasynyń úshinshi kúngi jumysy áriptestik memorandýmyna qol qoıýmen jáne marapattaý rásimimen jalǵasyn tapty. Túske deıin Mońǵolııa Ulttyq mýzeıindegi jumyspen tanysyp shyqqan delegasııa músheleri Mońǵolııa ǵylym akademııasynyń jetekshilerimen kezdesti. Kezdesý barysynda Mońǵolııa ǵylym akademııasy jáne Túrki akademııasymen birlesken áriptestik memorandýmyn bekitti. Demek, endigi jerde túrkitildes memleketter ǵalymdarynyń Mońǵolııa aýmaǵynda qalǵan balbal tastar tarıhyn tereń zerttep, tanyp-bilýge múmkindikter molaıa tústi. Jıynǵa qatysqan ekspedısııa músheleri sońǵy jyldary túrki áleminiń ózara ynty­maqtastyǵy nyǵaıyp kele jatqanyna toqtala kelip, túrkiler tulparynyń tuıaǵy jetken Eýrazııa qurlyǵynyń batysy men shyǵysynda jatqan tańbaly tastardy kózdiń qara­shyǵyndaı saqtap otyrǵany úshin mońǵol jurtyna myń alǵys bildirdi. Al jıyn sońyna qaraı birqatar mońǵol ǵalymdary men akademıkteri Túrki akade­mııasynyń arnaıy syılyqtaryna ıe boldy. Atap aıtqanda, kórnekti shyǵystanýshy, mońǵoltanýshy ǵalym, Mońǵolııa ǵylym akade­mııasynyń akademıgi Shagdaryn Bı­raǵa akademııanyń arnaıy altyn medali tabys etilip, Halyqaralyq mońǵoltaný qaýymdastyǵynyń bas hatshysy Domın Tómórtogonyń ıyǵyna qazaqsha shapan jabyldy. Keshe ekspedısııa músheleri Túrki akademııasy men Mońǵo­lııanyń Ortalyq muraǵat bas­qarmasy arasyndaǵy ekijaqty yntymaqtastyq týraly memorandým bekitý rásimine qatysty. Bul qujat keleshekte eki uıymnyń arhıv isi jáne qujat almasý salalarynda tyǵyz baılanys ornatyp, ózara ǵylymı derekter almasýǵa, sondaı-aq birlesken jobalardy júzege asyrýǵa múmkindik beredi. Qujatqa sáıkes, kásibı tájirıbeden ótkizý maqsatynda maman almasý máselesi de qaras­tyrylǵan. Memorandýmǵa qol qoıý saltanatyna TWESCO-nyń halyq­aralyq ekspedısııa qura­myndaǵy qoǵam qaıratkerleri men kórnekti ǵalymdar, jýrnalıster qatysty. Qujatqa qol qoıý rásiminen keıin Moń­ǵolııanyń Ortalyq muraǵat basqar­masy­nyń bas­tyǵy, tarıh ǵylymdarynyń doktory Ishjams Sarýýl myrza kóshpeli órkenıet tarıhyn zertteýge qos­qan úlesi men de­rektanýshylyq eńbegi úshin akademııanyń kúmis medalimen marapattaldy. Nurlybek Dosybaı, «Egemen Qazaqstan» – Mońǵolııadan