Dınara Sádýaqasova – álem chempıony

Qazaqstandyq shahmatshy Dınara Sádýaqasova 20 jasqa deıingi jastar arasynda Úndistannyń Bhývanesvare qalasynda ótken álem chempıonatynda bas júldeni jeńip aldy. Osy dodada ol áıelder arasyn­­daǵy grossmeıster jáne shahmattan halyqaralyq sheber atandy. Bul ataqtar álem chempıony atanǵan shahmatshyǵa beriledi. Jastar arasynda álem chempıony ataný Dınaranyń bala kezden bergi armany edi. О́ıtkeni, ol buǵan deıin jastar arasyndaǵy álemdik shahmattyń tájin basyna ólshep kórgen emes. Ol 2010, 2012 jáne 2014 jyldary úsh dúrkin álem chempıony bolǵan. Sol kezderi shahmatshy qyz 14, 17 jáne 18 jasqa deıingi jasósip­rimder arasynda ótken álem báıgesin ǵana jeńip alǵan bolatyn. Al osy jolǵy Dınaranyń chempıondyq ataǵy tipten erekshe. Bul ataq shahmatshyǵa áıelder arasyndaǵy grossmeıster atanyp, FIDE tizimindegi reıtıngin kóterip, jarysyn ózinen úlken shahmatshylar arasynda jalǵastyrýǵa múmkindik beredi. Bıylǵy chempıonatqa 57 shahmatshy qatysty. Dınara osylardyń arasynan qara úzip shyǵyp, 13 týrda 9,5 ball jınady. Bul jeńisine Dınara Sádýaqasova kóp ýaqyt daıyndaldy. Bıylǵy jyldyń sáýir, maýsym aılarynda Dýbaı men Tashkent qalalarynda ótken Azııa ulttary kýbogy men Azııa chempıonatyna qatysyp, baq syna­dy. Sonyń birinshisinde – qola, ekin­shisinde kúmis medaldi jeńip aldy. Al byltyr Armenııanyń Erevan qalasynda ótken Eýropa ýnı­­ver­­sıtetteri arasyndaǵy qurlyq klýb­tyq chempıonatynda bas júl­deni ıelendi. Sol jyly Dýshan­bede Ortalyq Azııanyń áıel­der arasyndaǵy chempıony atandy. Dınara alǵashqy kezde Astana­daǵy H.Omarov atyndaǵy shahmat klýbynda bes jasynan bas­tap tálim alyp, keıin sonymen qatar, mýzyka mektebiniń fortepıano synybyn úzdik aıaqtap, kórkem gımnastıkamen shuǵyldanǵan. Osy bilim ordasyn da úzdik dıplommen bitirip shyqqan. Biraq onyń shah­mat­­taǵy jattyqtyrýshysy Olga Cherepanova Dınaraǵa: «Shahmat pen gımnastıkanyń bireýin tańdaǵanyń durys», degennen keıin, ol gımnas­tıkany birjola qoıyp ketedi. Bul da bir jaǵynan durys bolǵan shyǵar. Qalaı degenmen, bizdiń kóz aldymyzda ala taqta óneriniń jaryq juldyzdary ósip keledi. Bul qatarǵa Dınara Sádýaqasovadan basqa Gúlishan Naqbaeva, Mádına Dáýlet­baeva, Gúlmıra Dáý­letova, Jansaıa Ábdimálik, Bıbi­sara Asaýbaeva sııaq­ty talantty qyzdardy jat­qyzý­ǵa bolady. Olardyń bári jas bol­sa da, elimizdiń ataq-dańqyn álem­ge tanytyp, shahmattyń damýy­na eleýli úles qosyp júr. Dastan KENJALIN, «Egemen Qazaqstan»