Beıbit álem bastamasyn baǵalady

Birikken Ulttar Uıymynyń Bas hatshysy Pan Gı Mýn Semeı ıadrolyq synaq polıgonynyń jabylýyna 25 jyl tolýy qarsańynda arnaıy joldaý jarııalady. Joldaýdyń mátini BUU-nyń resmı saıtynda ornalastyrylǵan. BUU Bas hatshysy 2016 jyldyń 29 tamyzynda búkil álemde 2009 jyly Qazaqstannyń bastamasy boıynsha BUU Bas Assambleıasy qabyldaǵan qararǵa sáıkes, Iаdrolyq synaqtarǵa qarsy is-qımyldyń halyqaralyq kúni atap ótiletinin qaperge salady. Bul kúni Birikken Ult­tar Uıymyn, oǵan múshe elder­di, úkimetaralyq jáne úkimettik emes uıymdardy, akademııalyq meke­melerdi, jastar jelisi men buqa­ralyq aqparat qural­daryn ıadrolyq synaqtarǵa qaýipsiz álem qurý jolyndaǵy mańyzdy qadam retinde tyıym salý qajettigin atap kórsetetin aq­pa­rat­tyq jáne aǵartýshylyq is-qımyldy belsendi ete túsýge úndeıdi. О́ziniń joldaýynda BUU Bas hatshysy osy kúni búkil álem Semeı synaq polıgonynyń – 450-den astam ıadrolyq synaqtar jasalǵan orynnyń jabylǵany­na shırek ǵasyr tolǵanyn atap ótetinin aıtady. – 2010 jyly men Semeıde bolǵan kezimde ýlanǵan jerlerdiń izin, sondaı-aq, synaq qurbandary men odan zardap shekkenderdiń sheshimdi is-qımyldaryn kórdim. Men olardyń ıadrolyq qarýdan azat beıbit álemge umtylysyn jaqsy túsinemin. Barlyq ıadro­lyq synaqtarǵa tyıym salý osy qasiretti muranyń tamyryna balta shabatyn bolady, – dep málimdeıdi Pan Gı Mýn. – Bul qarýsyzdaný sala­syndaǵy basqa da bastamalarǵa úlken serpin berýge jaǵdaı týǵyzyp, osy baǵyttaǵy kópjaq­ty yntymaqtastyqty nyǵaıta túsetinine senimim mol. Sondaı-aq, Taıaý Shyǵysta ıadrolyq jáne basqa da jappaı qyryp-joıatyn qarý túrlerinen azat álem qurý bastamasyn qosa alǵanda, óńirler deńgeıinde qabyldanyp jatqan qaýipsizdik salasyndaǵy qarym-qatynasqa oń yqpalyn tıgizýi yqtımal, – dep jalǵaıdy sózin Bas uıym basshysy. BUU Bas hatshysy Bas Assamb­leıa osydan 20 jyl buryn qabyl­daǵan, biraq, ókinishke qaraı, áli de kúshine enbeı kele jatqan Iаdrolyq synaqtarǵa jappaı tyıym salý týraly shartty barlyq elder men halyqtardyń jedel qol qoıyp, qabyldaýy qajettigi máselesin kezekti márte kóteredi. Sonda, deıdi Pan Gı Mýn, biz ıadro­lyq qarýdan azat álemge qaraı ilgeri qadam jasaı alǵan bolar edik.