Mereıli marapattar

Rıo-de-Janeırodaǵy  jazǵy  Olımpııa oıyndarynan  júldemen oralǵan sportshylardy jetisýlyqtar da erekshe qurmetpen qarsy aldy. Osyǵan arnalǵan shara Taldyqorǵandaǵy Oqýshylar saraıynda saltanatta jaǵdaıda ótkizildi. Jıyndy Almaty oblysy ákiminiń birinshi orynbasary Lázat Turlashev ashty. – Álemniń 205 elinen bas qosqan kil myqty­lardyń arasynda Qazaqstan sportshylary da ózderin jaqsy qyrlarynan tanytty. Olardyń arasynda Jetisý óńiriniń sańlaqtary da boldy. Atap aıtqanda, bizdiń jankúıer qaýym sol kúnderi aýyr atletter saıysynda kórik qyzdyrǵan Karına Gorıcheva men Margarıta Elıseevanyń, sondaı-aq, boksshy Jánibek Álimhanulynyń jaqsy ónerlerine tánti boldy. Oblystan osyndaı sportshylardyń Rıoda kórinýi biz úshin de maqtanysh, – dedi ol óziniń sózinde. Budan keıin jıyn Oıyndar júldegeri men qatysýshylaryn marapattaý rásimine jalǵasty. Onda oblys ákiminiń orynbasary aýyr atletter saıysynda qola medalǵa qol jetkizgen Karına Gorıchevaǵa 10 mln teńgeniń, al besinshi oryndy ıelengen Margarıta Elıseevaǵa 3 mln teńgeniń sertıfıkattaryn tapsyrdy. Sóıtip, Brazılııa jerinde kók baıraǵymyzdyń kóterilýine eńbek sińire bilgen ziltemirshilerge el alǵysy bildirildi. Sonymen qatar, bul kúni óńir sportynyń órleýine ózindik eńbekterin sińirgen ardager sportshylar men osy sala qyzmetkerleri «Qurmetti sport qyzmetkeri» tósbelgisimen jáne oblys ákiminiń Qurmet gramotalarymen marapattaldy. Nurbol Áldibaev, «Egemen Qazaqstan»  TALDYQORǴAN