Jeńimpazdar joly jalǵasady

Astanada Ulttyq Olımpıada komıtetiniń prezıdenti Tımýr Qulybaev pen Mádenıet jáne sport mınıstri Arystanbek Muhamedıuly Olımpııa oıyndarynyń chempıondarymen jáne júldegerlerimen kezdesti. Kezdesýge sportshylarmen birge jattyqtyrýshylar, Olım­­pıadaǵa elimizdiń delega­sııasynyń qura­myn­da barǵan sport mamandary qatysty. Kezdesýde UOK prezıdenti men Mádenıet jáne sport mınıstri otandastarymyzdy jeńisterimen quttyqtap, Olımpıadaǵa qatysty óz oılaryn ortaǵa saldy. Onda aldymen Ulttyq Olımpıada komı­tetiniń basshysy sóz alyp, sport­shylarǵa rızashylyǵyn bildirdi. – Sizderdi Olımpıadanyń sátti aıaqtalǵanymen quttyqtaımyn. Olımpıada bizdiń sportshylar úshin el namysyn abyroımen qor­ǵap, otansúıgishtigimizdi kór­setetin jarys alańy boldy. Sportshylarymyzdyń jeńisi elimizde sportty damytýda tıisti jumystardyń jasalyp jatqanyn kórsetti. Qazaqstan Olımpıadada eshqashan 17 júlde alyp kórgen emes. Sizder jarys alańynda namysqa tyrysyp, osy medaldardy jeńip ákeldińizder, – dedi ol. Osydan keıin Mádenıet jáne sport mınıstri sóz alyp, sport­­­shylar men jattyqtyrý­­shy­­lardyń eńbegin, ulttyq qura­­ma­­nyń jarysqa jaqsy daıyn­dal­ǵanyn, sol úshin Ulttyq Olım­pıada komıteti men jat­tyq­tyrýshylardyń osy iske basy­nan sońyna deıin aralasqan basqa da sport mamandarynyń eńbegin bas barmaqpen baǵalaı­tynyn aıtty. Kelesi kezekte sóz Olımpıada chempıondary men júldegerlerine berildi. Aldymen boksshy Danııar Eleýsinov minberge shyǵyp, UOK prezıdentine Olımpıadada ǵana emes, oǵan daıyndyq kezinde de kórsetken qoldaýyna alǵys bildirdi. Odan keıin Olımpıada­da alǵan áseri týraly júzgish Dmıtrıı Balandın de aıtyp berdi. – Fınalda júzip bolǵannan keıin, tabloǵa qarasam, eshnárse túsinbedim. Qatelik bolǵan shy­ǵar dep oıladym. Sodan keıin ǵana qurmet tuǵyryna shyq­qanda jeńiske jetkenimdi sezin­dim. Sol jerde elimizdiń Án­ura­ny shyrqalyp, kók Týymyz kóteril­gende, boıymdy barlyq Qazaqstan halqy úshin maqtanysh sezimi kernedi. Bul sezimdi jetkizý qıyn. Qazaqstanǵa sondaı sezim­di syılaǵanyma qýandym. Jeńis tuǵyrynda elimizdiń kók baıra­ǵynyń ózgelerden bıik turǵanyn maqtan tuttym, – dedi Olımpıada chempıony. Áıelder kúresinen kúmis júldeger Gúzel Manıýrova da Olımpıadadaǵy sportshy­lary­myzdyń jeńisi búkil elimiz­diń ortaq jeńisi ekenin atap ótti. Osydan keıin bokstan ult­tyq qurama komandanyń bas jat­tyq­tyrýshysy Myrzaǵa­lı Aıt­janov sóz alyp, jarys­ta bol­ǵan básekelestik týraly aıtty. Jıynnyń sońynda Olım­pıadada baspasóz ortalyǵynyń jetekshisi qyzmetin atqarǵan Baqytjan Ordabaev Olımpıada jańalyqtaryn berip, reportaj ja­saǵan jýrnalısterdiń ju­my­syn joǵary baǵalady. Dastan KENJALIN, «Egemen Qazaqstan»