Bir qustyń baǵasy 400 000 dollar
Kýveıtte ótken kezekti qus saýdasy aýksıonynda bir qus orasan zor aqshaǵa 400 000 dollarǵa satyldy.
Bul jolǵy lotta qolǵa úıretilgen roller kepteri óte-móte tanymal bolyp, qoldan qolǵa tımedi. Onyń osynshalyqty mańyzdy bolyp jatqany óz túri boıynsha aspanda qalyqtap ushyp júrgende alýan qımyl kórsete alatyn qabileti bar jalǵyz qus ekendiginde shyǵar. Sondyqtan da olardy keıde «akrobat» dep te atap jatady. Aldymen roller kepteriniń biri 76 000 dollarǵa satyldy. Al sońynan belgııalyq osyndaı qus 400 000 dollarǵa ótip ketti.
Qarnyna qyryq pyshaq qalaı syıǵan?
Úndistannyń Pendjab shtatyndaǵy Gýrdaspýr qalasynda hırýrgter bir kisige ota jasap jatqanda, onyń qarnynan artyq-kemi joq qyryq pyshaq shyqqan.
Esimi atalmaı otyrǵan 42 jastaǵy azamat áýeli ishi aýyratynyna shaǵynyp, aýrýhanaǵa jatqan. Aýrýhana basqarýshysy, doktor Djıtınder Malhotra naýqasty dereý ÝDT-ǵa jiberedi. Sonda dárigerler onyń ishinde qatty bir zattyń jatqanyn baıqaıdy. Osy kezde pasıent sońǵy eki aıda ózin ózi ustaı almaı, «dámi unaǵan» temir zattardyń bárin jeı bergenin aıtady. Nátıjesi álgindeı bolyp shyqty. Syrqat operasııadan keıin ózin jaqsy sezingenin aıtqan.
Pıngvınge general ataǵy berildi
Norvegııa koroldigi gvardııasynyń Shotlandııadaǵy Edınbýrg haıýanattar baǵynda ómir súretin Nıls Ýlaf degen laqap aty bar pıngvınge general ataǵy berildi.
Osyǵan arnalǵan saltanatty shara zooparktiń terrıtorııasynda ótken. Oǵan 50 gvardııashy qatysqan. Dástúrge saı bul qus áskerıler sapynyń aldynan júrip ótken. Onysy is júzinde baıqaý bolyp shyqqan. Sol kezde oǵan áskerı qurmet kórsetilgen. Norvegııa korol pıngvınin Edınbýrg parkine berý úrdisin 1913 jyly bastapty. 1972 jyldan bastap olarǵa áskerı ataq berý qolǵa alynǵan. Ol gvardııashylardyń Edınbýrg saıabaǵyna ár kelgeninde jasalyp turǵan.
Eýropadaǵy eń kári aǵash – Grekııada
Ǵalymdar Grekııanyń soltústiginen ósip turǵanyna myń jyldan asyp ketken bosnııa qaraǵaıyn taýypty.
Oqymystylardyń boljamy boıynsha, ol Eýropadaǵy eń kári aǵash bolyp shyqty. 941 jyly kishkentaı uryq túrinen shybyq bolyp kóktegen daraq búginde 1075 jasqa kelip tur. Stokgolm ýnıversıteti, Maıns ýnıversıteti, Arızona ýnıversıteti zertteýshilerinen quralǵan komanda aǵashqa grek qudaıynyń qurmetine «Adonıs» degen at qoıdy. Endi olar Pınd taýlary baýraıynda ósip turǵan basqa da myń jyldyq tarıhy bar aǵashtar aımaqtyń on ǵasyrlyq klımatynan maǵlumat beretinine úmittenip otyr.
Pýtın syılaǵan BMW-lar satýǵa shyǵaryldy
Reseı prezıdenti Vladımır Pýtınniń Rıo-de-Janeıroda altyn medal alǵan olımpıadashylarǵa syılaǵan BMW H6 avtomobılderiniń biri keshe saýdaǵa shyǵarylǵany belgili bolyp qaldy.
Bul týraly aqpar kólik satýmen aınalysatyn saıttardyń birinen oryn alǵan. «R-Sport» basylymynyń anyqtaǵanyndaı, satýǵa shyǵarylǵan kólik sınhrondy júzýden Oıyndar chempıony atanǵandardyń biriniki kórinedi. Atalǵan kólikterde ony alǵan adamdardyń aty-jónderi ǵana jazylǵan. Olar on kúnge deıin osylaı júre alady.
Shotland polıseıleri hıdjab kıe beredi
Shotlandııada polısııada qyzmet etetin musylman áıelderge jumys kezinde ózderiniń dástúrli kıimi – hıdjab kıip júrýge resmı túrde ruqsat etildi.
Mundaı sheshimniń musylman áıelderdiń kásibı bedelin arttyrýǵa jáne qatarǵa jańa kadrlar tartýǵa baǵyttalǵany aıtylyp jatyr. Shotlandııada budan buryn da tártip saqshylaryna hıdjab kııýge tyıym salynbaǵan. Alaıda ondaı qurmetke jetý úshin mindetti túrde aǵa ofıserler quramynan bolýyń kerek-tin. Bılik tarapynan bolyp jatqan mundaı qadamdy eldiń musylman polıseıleri qatty qoldady.
Aqparat agenttikteriniń materıaldary boıynsha daıyndaldy
