Este qalar erekshe sabaq

Keshe Konstıtýsııa kúnine jáne el Táýelsizdiginiń 25 jyldyǵyna arnalǵan «Ata Zań – eldigimniń eńsesi» taqyrybynda merekelik shara ótti. Oǵan №64 mektep-lıseıiniń birinshi synyp oqýshylary da qatysty. Atalǵan shara on jyldan beri dástúrli túrde ótkizilip keledi. Bul jolǵy sabaqtyń ereksheligi – Tuńǵysh Prezıdent mýzeıindegi «Qazaqstan Respýblıkasynyń Memlekettik rámizderi» atty ekspozısııasynyń janynda ótkizilýi. Munda Memlekettik Ánurannyń mátini, Eltańba, Tý jáne elimizdiń Konstıtýsııasy qoıylǵan. 1997 jyldan  2004 jylǵa deıingi jeti jyl boıy Elbasynyń alǵashqy rezıdensııasy bolyp, memlekettik etalondar ornalasqan jerde oqýshylar Ata Zań men memlekettik nyshandar tarıhyna boılap, jádigerleri týraly túsinikterin keńeıtti. Tarqatyp aıtqanda, ekspozısııalardyń tarıhy men mańyzy týraly mol maǵlumat aldy. Qoldanystaǵy, ıaǵnı 1995 jyldyń 30 tamyzynda qabyldanǵan Konstıtýsııa adam, onyń ómiri, quqyǵy men mindetteri joǵary qundylyq bolyp tabylatyn respýblıkanyń demokratııalyq quqyqtyq memleket retinde damýynyń jańa qadamy boldy. Konstıtýsııa memleket damýynyń irgetasyna aınalǵan erekshe tarıhı mańyzdy qujat ekendigin balalar da jete sezindi. Sondaı-aq, patrıotızmdi, respýblıka táýelsizdigin jáne Qazaqstan halqynyń birligin búldirshinder ózderiniń taqpaqtaryna arqaý etip, án de shyrqap berdi. Birinshi synyp oqýshylary Otan, týǵan til, memlekettik rámizder týraly túsinikterimen bólise otyryp, Qazaqstan Respýblıkasynyń Tuńǵysh Prezıdenti – Elbasy N.Nazarbaevtyń negizgi zańdy ázirleýdegi róli týraly da jatqa aıtty. Asqar TURAPBAIULY, «Egemen Qazaqstan»