1 qyrkúıekten bastap «Egemen Qazaqstan» respýblıkalyq gazetiniń Astanadaǵy taralymy tolyǵymen túrli-tústi boıaýmen shyǵady. Bul týraly Ortalyq kommýnıkasııalar qyzmetinde ótken brıfıng barysynda «Egemen Qazaqstan» respýblıkalyq gazeti» AQ basqarma tóraǵasy Darhan Qydyráli málim etti.
Onyń aıtýynsha, basylymnyń basqa óńirlerdegi taralymy túrli-tústi boıaýǵa jergilikti polıgrafııa kásiporyndarynyń múmkindikterine qaraı jańa jyldan bastap kóshedi.
«Biz keleshekte eýropalyq standarttaǵy A2- formatyna kóshý múmkindigin de qarastyryp jatyrmyz. Eger bul formatqa kóshsek, gazetti kóliktegi, ushaqtaǵy jolaýshylardyń oqýyna óte qolaıly bolar edi dep oılaımyz», – dedi D.Qydyráli.
Sonymen qatar, «Egemen Qazaqstan» gazetiniń shetelderdegi arnaýly tilshiler qosynyn ashý da josparlanyp otyr. Basqarma tóraǵasy qazir bul baǵytta jumys júrgizilip jatqanyn atap ótti. «Birinshi kezekte alys-jaqyn shetelder, sonyń ishinde Qazaqstanmen mańyzdy strategııalyq seriktes elder nazarǵa alynbaq», – dedi ol.
Aıdar О́RISBAEV
