Astanada marafon márege jetti

Astanada qaıyrymdylyq maqsatta uıymdastyrylǵan dástúrli marafon aıaqtaldy. Bul jarysta birinshi bolyp márege «Adıdas» komandasynyń ókili Rýslan Aglov kelip jetti. Ony márede Premer-Mınıstr Kárim Másimov quttyqtap, medal tapsyrdy. Búgingi estafetaǵa qalanyń qarapaıym halqy men Úkimet músheleri, birneshe otandyq jáne halyqaralyq kompanııalardyń ókilderi, elshilikterdiń qyzmetkerleri, alys jáne jaqyn elderdiń sportshylary qatysty. Qolda bar málimetke qaraǵanda búgin júgirý jarysyna 5 myńnan astam adam shyqty. Olar tańerteńnen bastap túski saǵat 14.00-ge deıin júgirýden jarysty. Sheteldik qonaqtardyń arasynda Astanaǵa qyzmet babymen jáne demalýǵa kelgen Amerıka, Afrıka, Azııa men Eýropa elderiniń azamattary boldy. Bul synda Úkimet basshysy Kárim Másimov 21,1 shaqyrym qashyqtyqty 2 saǵatta júgirip ótti. Odan Mádenıet jáne sport mınıstri Arystanbek  Muhamedıuly men Aqparat jáne kommýnıkasııalar mınıstri Dáýren Abaev ta qalyspaı, jarysqa qatysty. Olar márege jetkennen keıin  bıylǵy Olımpıadanyń chempıondarymen jáne júldegerlerimen kezdesip, emen-jarqyn áńgimelesip, birge estelikke fotosýretke tústi. Prezıdent Ákimshiliginiń jetekshisi Ádilbek Jaqsybekov 42,2 shaqyrymdyq qashyqtyqqa júgirdi. Ol bul shaqyrymdy 4 caǵat 22 mınýtta júgirip ótti. Bul az qashyqtyq emes. Ádilbek Ryskeldiuly fınıshke kelgende osyny jasyrmaı, 42,2 shaqyrymǵa júgirýdiń ońaı emestigin, jarty jolda marafondy aıaqtaý oıynda bolǵanyn, degenmen namysqa tyrysyp, sońyna deıin júgirýdi maqsat etkenin aıtty. Osylaı deı kelip, ol marafondy uıymdastyrýshylarǵa alǵysyn aıtyp, Elbasynyń halyqtyń salamatty ómir saltyn ustanýǵa, sportpen aınalysýyna erekshe mán beretinin, ony eldiń bári qoldaıtynyn, sonyń bir dáleli osyndaı buqaralyq jarystardyń jıi ótkizilip jatqanyn atap ótti. Búgingi sharaǵa sheteldik otbasylar men zaǵıp jandar da  qatysty. Kózi nashar kóretin Aıtbek Aýylbaev degen jigit on shaqyrymdyq qashyqtyqqa jarysty. Marafon kezinde oǵan árıne, kópshilik eriksiz tańdanystaryn jasyrmady. Jalpy, marafon Esil, Almaty jáne Saryarqa aýdandaryn qamtydy. Oǵan qatysqan adamdar 42,2 shaqyrym, 21,1 shaqyrym, 10 shaqyrym men  estafetalyq júgirýlerde baq synasty. Dastan KENJALIN