Taý shatqalynda – «Toı qazan»

Demalys kúni bıik taýdaǵy «Medeý» sport kesheninde ulttyq taǵamdar festıvali ótti Bıylǵy halyqtyq bul shara Almaty qalasynyń 1000 jyl­dyǵyna oraılastyryp uıymdastyryldy. Shaharda 2 myńnan astam dámhana men meıramhana bar bolsa,  solardyń ishinen eń tańdaýlylary men úzdikteri aldyńǵy lekke oza shyǵyp, «Toı qazan» festıvaliniń qonaqtaryna dám daıyndap usyndy. «Toı degende qý bas domalaıdy...» degendeı, áıgili shatqaldyń qoınaýyn áp-sátte án men kúı terbedi. Taza aýa, salqyn samal, jupary ańqyǵan kóktiń hosh ıisi til úıirgen dámdi taǵamdardyń tanaý qýyrǵan ıisimen aralasyp, kelýshilerdiń kóńil-hoshyn kóterdi. – Bizdiń qazaq halqy qashanda qonaqjaılylyǵymen erekshelengen. Búgingi «Toı qazan» festıvali –  ulttyq qasıetterimizdiń aınasy desem artyq aıtqandyq emes. Sol sebepti de bul dýman dál búgin – birlik pen dostyqtyń, kelisim men keńesýdiń merekesine aınalyp otyr, – dep sóz bastaǵan qala ákimi Baýyrjan Baıbek mádenı sharanyń tusaýyn kesip berdi. Qala basshylyǵynyń bastamasyn qoldaǵan Qazaqstan halqy Assambleıasynyń músheleri de toı ústinde aıanyp qalǵan joq. Boıǵa jıǵan, toıǵa daıyndaǵan bar ónerin qyzynyp ortaǵa saldy. Qyzyl-jasyldy ulttyq kıimderin kıip án salǵan, bı bılegen, dámdi tamaq pisirgen, ultyq sport oıyndaryn birinen soń birin tizip kórsetken dýmandy toptyń kósh basynda Qazaqstan halqy Assambleıasy Tóraǵasynyń orynbasary Eraly Toǵjanov júrdi. Sondaı-aq, qalyń toptyń ortasynda dýmandy toppen jarqyldaı pikir alysyp júrgen Taldyqorǵan qalasynyń ákimi Baǵdat Qarasaevty da kózimiz shaldy. Kóp keshikpeı Almatyǵa aty tanymal áıgili «Baýyrsaq shoýdyń» belgili bı-qazylar alqasy eń dámdi pisirilgen tamaq túrlerine baǵa berdi. Mazmuny jaǵynan kóp qyrly sanalatyn festıvalda dámdi taǵam pisirýmen qatar ózge de san túrli sharalar kórsetildi. Onyń aıǵaǵy retinde sport alańynyń bir buryshynda eń úzdik  «Ulttyq kıimderge» júldeler tapsyrylyp jatsa, bir buryshynda ulttyq-sporttyq jarystardan báseke qyzdy. Alaıda, festıvaldyń shyraıyn ashqan «Toı qazan daýysy»  án baıqaýy ekeninde eshkimniń daýy bolmady. Baıqaýda 11 ulttyń «jul­dyz­dary» ónerin ortaǵa saldy. Jeńimpazdarǵa arnaıy júlde tapsyryldy. Jınalǵan qaýym qazirgi qazaq óneriniń aqmańdaı ánshileri men belgili mýzyka toptarynyń ónerin de dúrkin-dúrkin qol shapalaqtap tamashalady. Tańdaýly opera ánshileri Maıra Muhamedqyzy, Súndet Baı­ǵo­jın, ataqty «Dos-Muqasan», «Mýz­art», «Dervıshı», «Rıngo» toby men Me­deý Arynbaev, Seıfýllın Jol­barys, Jeńis Seıdollauly, Gúlnar Tólegenova, Gaýhar Sattarova, skrıpkashylar Jámıla Serkebaeva men Aıda Aıýpova taý shatqalyn ásem án men ádemi sazǵa bóledi. Aıtpaqshy, «Kitapfest» bury­shyna moıyn burǵandar da óte kóp boldy. Aıtýǵa mindettimiz, halyq masaıraǵan mundaı qyzyqty toı-dýmanǵa kirý bıletiniń baǵasy 3 myń teńge turdy. Al on jasqa deıingi balalar festıvalǵa tegin kirdi. ...Taý shatqalyndaǵy toı-dýman aspanda juldyz jamyraǵan ýaqytta tarady. Talǵat SÚIINBAI, «Egemen Qazaqstan» ALMATY Sýretti túsirgen Nıkolaı SÝDAKOV