Goto tórt ret úılengen eken. Áıelderi jáne baýyrlary túgel qaıtys bolǵan. «Qashanda shydamdy, sabyrly bolýǵa tyrystym, uzaq jasaýymnyń syry osynda. Jáne ózimdi kútimge alatyn adamdardyń bolatynyna sendim. Ondaı jaqyndarym bar. Bul da jasymdy uzartyp jatyr» deıdi ol. Bir tańǵalarlyǵy, aqsaqal shylymqor bolǵan, qazir de temekini kóp tartady. Jeke kýáliginde Gotonyń 1870 jylǵy 31 jeltoqsanda týǵany kórsetilgen. Jergilikti bılik ókilderi qujattaǵy derekter ras deıdi. Derekter resmı qujattar jáne Gotonyń óz sózi negizinde jasalypty. Alaıda, Indonezııada jańa týylǵan adamdardy tirkep qujat berý 1900 jyly bastaldy. Al oǵan deıin dúnıege kelgenderdiń týǵan jyl derekterinde qatelikter ketken kezder bolǵan. Degenmen, jerlesteri Gotonyń 145-ke kelgenine kúmándanbaıdy. Jáne ony erekshe qurmetteıdi. Goto Táýelsizdik meıramyna baılanysty sharalarǵa arnaıy shaqyrýmen kelip, ótken zamandar týraly qyzyq áńgimeler aıtady. Mysaly, Japonııamen soǵys jáne golland otarshylary jaıynda baıandaıdy. Nemeresi Sıýrıanto «Atam eshqashan kirpııaz bolǵan emes, eshkimniń mazasyn almaıdy, bergen tamaǵymyzdy jep, bardy qanaǵat tutady» deıdi. Tek ólmeı turǵanda qabirine qoıatyn qulpytas satyp alyp qoıýdy ótinipti. «Burynǵydaı qýat joq, qazir áreń júrip-turam, ómir súrýden sharshadym da. Qulpytas daıyndap qoıǵym keletini sodan. Men ólgende bári turǵanyn qalaımyn. Shynymdy aıtsam, ólgim de keledi, biraq ýaqytym kelgen joq» deıdi. Mbah Goto buryn sharýa bolǵan, balyqshylyqpen aınalysqan adam eken.
