Astanada Qurban aıtta mal baǵasy óspeıdi

Astanalyqtar qurbandyqqa mal shalý úshin kúni buryn daıyndalyp jatyr. Ázirden soıatyn mal izdep, sharýa qojalyqtaryna jóńkilip júrgender bar. Basylym tilshisi dinı mereke qarsańynda qala mańyndaǵy mal bazarynyń birinde bolyp, usaq jáne iri qara mal baǵasyn bilip qaıtty. Oblys ortalyǵyna jaqyn mańaıdaǵy Qosshy kentinde ornalasqan bazarda saýda qyzyp jatyr. Satýshylardyń aıtýynsha, soıýǵa mal izdep kelgender kúndegiden kóp. Biraq basym bóligi baǵany baqylap júrgender. Osy oraıda, bazar ákimshiligi meıram kezinde mal qunyn ósirmeımiz dep sendirip otyr. Sebebi, satylymda turǵan tórt túlik túgeldeı jaqyn mańaıdaǵy sharýa qojalyǵynda ósirilip, bazarda bordaqylanady. Bir qyzyǵy, aıt kúnderi munda alypsatarlardyń jáne ózge sharýa qojalyǵynyń maldary satylmaıdy. – Biz qashanda baǵany negizsiz kótergen emespiz. Qurban aıtta mal ótimdi bolady eken dep tórt túlikti qymbattatpaq nıetimiz joq. Bári burynǵysynsha saqtalady, – deıdi bazar basshysy Serik Shoqan. Sonymen eń ótimdi bolyp turǵan marqalardyń baǵasy 26 myńnan bastalsa, iri qoılar 40 myńnyń o jaq, bu jaǵynda. Satylymda turǵan tórt túliktiń birde-biri syrttan ákelinbegen. Árqaısysy jiti tekserýden ótip, mal dárigerleriniń ruqsatymen satylýda. Bazardyń mal satý jónindegi menedjeri Sultanbek Tinálıdiń aıtýynsha, qurbandyqqa jaraıtyn qoı kemi bir jasar bolýy qajet. Dese de, alty aılyq qozy bir jasar qoı sekildi iri, qońdy bolsa qurbandyqqa jaramdy sanalady deıdi ol. Sıyr eki jasar bolǵanda ǵana qurbandyqqa shalynady. Bıyl bazarda 3 myńǵa jýyq qoı saýdaǵa shyǵady. О́ıtkeni, byltyr osy meıram kezinde 2600 qoı qurbandyqqa shalynypty. Aıtpaqshy, ádettegideı arnaıy mal soıý orny men qasapshylar da qarastyrylady. Usaq maldardy soıyp, jiliktep berý nebári 1000 teńge bolsa, bas úıitý 300 teńge. О́tken jyly bazarda 170-ke tarta iri qara satylǵan. Buqalar byltyrǵydaı 200-300 myńnan saýdalanýda. Nurbaı ShÁKIM