Qazmedıa Ortalyǵy» ǵımaratynda Aqparat jáne kommýnıkasııalar mınıstri Dáýren Abaevtyń qatysýymen «Qazaqstan» RTRK» AQ-tyń keńeıtilgen alqa májilisi ótip jatyr. Májiliske «Qazaqstan» RTRK» AQ-nyń basqarma tóraıymy Nurjan Muhamedjanova men korporasııanyń departamentteri men bólimderiniń jáne qurylymdyq bólimsheleriniń basshylary qatysýda.
«Qazaqstan» RTRK» AQ elimizdegi telehabar taratatyn birinshi arna. Sol sebepti onyń jumysy da soǵan saı bolýy kerek. Ol úshin mınıstrlik tarapynan qashanda qoldaý kórsetilip keledi jáne aldaǵy ýaqytta da solaı bolady. Búgingi tańda Sizderdiń aldylaryńyzda qoǵamdy sapaly ári tyń aqparattarmen qamtamasyz etý baǵytynda úlken mindetter tur. Osy rette biz ásirese Korporasııanyń aımaqtardaǵy ókildikteriniń jumystaryn jetildirýge kúsh salý qajettigin aıtqymyz keledi. Aımaqtarda materıaldyq-tehnıkalyq bazanyń jaǵdaıy da nazarǵa alynǵany jón», - dedi mınıstr Dáýren Abaev. Buǵan qosa mınıstr habar taratý barysynda Qazaqstan Táýelsizdiginiń 25 jyldyǵy erekshe nazarda bolýy qajettigin eskertti. Sondaı-aq ol mınıstrlik pen quzyrly organdar tarapynan Golovkın-Brýk kezdesýi sııaqty aıtýly sharalardy kórermenderge jetkizý baǵytynda da tıisti jumystar júrgizilip, aldaǵy ýaqytta qalyń kópshilik kópten kútken osy saıysty tamashalaı alatyndyqtaryn jetkizdi. «Mınıstrlik tarapynan elimizde habar taratý isine barynsha kóńil bólinip keledi. Endigi kezek tek Sizderdiń jumyla jumys isteýlerińizge baılanysty», - dep atap kórsetti D.Abaev.
Jıynda baıandama jasaǵan «Qazaqstan» RTRK» AQ Basqarma tóraıymy Nurjan Muhamedjanova ózi basqaryp otyrǵan ujymnyń jumysy men jetistikteri týraly esep berip, aldaǵy josparlary jaıly aıtty. Onyń sózine qaraǵanda, "Qazaqstan" ulttyq telearnasy jasaǵan telehıkaıalar shetelde joǵary suranysqa ıe. «Kórermender yqylasyna bólengen «Syrǵalym», «Qasym», «Jambyl» kórkem telehıkaıalary búginde Reseı, Tatarstan, AQSh, Kıpr men Slovenııa elderinde kórsetilýde», - dedi Nurjan Jalaýqyzy.
Keńeıtilgen alqa májilisi kezinde «Kazsport» telearnasynyń dırektory Pavel Sybýlın de baıandama jasady. Ol «Aqparatty Qazaqstan-2020» memlekettik baǵdarlamasynyń nasıhattalýdaǵy mańyzyn, salamatty ómir saltyn negiz etken maqsat-mindetterdiń, otandyq jáne sheteldik sporttyq oqıǵalarmen aqparattandyrýdyń mańyzdylyǵyna toqtaldy. Eń bastysy – qazaqstandyqtardyń nazaryn sportqa aýdarý ekenin aıtty.
«Telearna sport salasy boıynsha 7 baǵytta qyzmet etedi. Kóbine efırde kásibı sportpen baılanysty kontent beriledi. Olardyń qatarynda QR Mádenıet jáne sport mınıstrligi usynǵan jarystardyń jyldyq josparyna jáne qazaqstandyq atletterdiń qatysýymen ótetin halyqaralyq saıystardyń kestesine sáıkes túrli chempıonattar men týrnırlerden translıasııalar bar», - dep atap ótti P.Sybýlın.
