Qyrǵyzdar ozyp tur

Qyrǵyzstannyń Ystyqkól oblysynda ótip jatqan Kóshpelilerdiń dúnıejúzilik II oıyndary burnaǵy kúngi saıystarynyń qorytyndysynda alań ıeleri alǵa shyqty. Olardyń qorjyndarynda qazir 13 altyn, 12 kúmis jáne 13 qola medal bar. Ekinshi orynǵa 10 altyn, 5 kúmis jáne 6 qola medalmen Reseı quramasy jaıǵasty. Al 5 altyn, 6 kúmis jáne 7 qola medali bar Qazaqstan sportshylary úshinshi bolyp keledi. Bul kúngi jarystar Qyrchyndaǵy at báıgesinen bastaldy. Sport kesheninde qyrǵyz kóreshi men túriktiń aba-gıýreshi oınaldy. «Kógildir Ystyqkól» pansıonatynda qyrǵyzdyq ordo atty asyq oıyny, «Avrorada» toǵyzqumalaqtyń qyrǵyzsha nusqasy – togýz-korgool men túrikshe túri – mangala shaıqastary jalǵasty. Qyrchyn shatqalynda ótken 80 shaqyrymdyq alamanda qyrǵyzstandyq Jenısh Batyrkýlovtyń Aqqulasy kómbege birinshi bolyp keldi. Kórermender osy jerde kıiz úıdi jyldam jınastyrýdan quralǵan jarysty da qyzyǵa tamashalady. Oǵan Qyrǵyzstannyń barlyq 7 oblysynan 33 komanda qatysty. Sol kúni jaılaýda qyrǵyz tazylary – taıǵandardy jarystyrý da bolyp ótti. Sadaq atýdan qyrǵyzstandyq Azamat Akýnov birinshi oryndy jeńip aldy. Al Cholpon-Ata ıppodromynda kókpardyń toptyq oıyndary aıaqtaldy. Onda A tobynan Qazaqstan quramasy kósh bastady. V tobynda Qyrǵyzstan komandasy eshkimdi shaq keltirmedi. Endi osy komandalar arasyndaǵy fınaldyq saıys búgin ótedi. Úshinshi orynnyń taǵdyry bashqurt jáne qytaılyqtar arasyndaǵy oıynmen sheshiledi. Munda Aspanasty eliniń namysyn sonda turatyn qandastarymyz qorǵap júrgenin de aıta keteıik. Qyrǵyz kúresi 7 salmaq dárejesi boıynsha ótti. Alań ıeleri barlyq birinshi oryndy ózderi jeńip aldy. Qazaqstan balýandary 3 kúmis, 1 qola medalǵa ıe boldy. Atap aıtqanda, kúmis medaldy Aıylbek Aıtkaly (60 kg), Qýanysh Ysqaqov (66 kg), Suńǵat Zákárıaev (96 kg), qola medaldy Ospan Daýylbaı (55 kg) ákeldi. Oıyndar búgin óziniń máresine jetedi. Damır QOJAMQUL