Baıan Esentaeva: «Odan da bárin ózim aıtaıyn»

  Prodıýser Baıan Esentaeva maýsym aıynda kúıeýimen bolǵan janjalda soqqyǵa jyǵylyp, aýrýhanaǵa túskeli birinshi ret suhbat berip, sol kúngi oqıǵalar týraly baıandady. «Sol bes kún ómirimdegi eń jaman kúnder boldy. 10 maýsymdaǵy jaǵdaı áli sanamnan shyqpaıdy» dedi ol. Suhbatty Esentaeva telejúrgizýshi Dınara Sátjanǵa berdi. «Áli depressııadamyn» Prodıýser osy kúnge deıin óz-ózine kele almaı júrgenin aıtty. «Rasyn aıtqanda, áli depressııadan shyqqam joq. Sebebi, úreıden aryla almaı júrmin. Bes qadamǵa jaqyndaǵan kez kelgen er adamnan qorqam» deıdi Baıan Esentaeva. Jáne de mundaı jaǵdaıda óz-ózin ustaý qıynǵa soǵatynyn aıtady. Tabıǵatymnan erik-jigerim kúshti bolǵandyqtan, bul qıyndyqtan shyǵý kerektigin túsinem deıdi prodıýser. Osy oqıǵalar týraly jáne qazirgi kúıin baıandaý Esentaevaǵa óte aýyr ekeni suhbat kezinde anyq bilinedi. Ol birneshe ret kózine kelgen jasty áreń toqtatty. Al suhbat ortasynda kóz jasyn irke almady. «Bul suhbatty bermes edim. О́ıtkeni, qazir jurt bet-álpetimniń qandaı ekenin kórip otyr ǵoı. Bul da maǵan óte qıyn. Biraq amal ne, BAQ tarapynan maǵan sumdyq shabýyl jasalyp jatyr. Ondaı áreketke barmaýdy, bolmaǵandy bolǵandaı etip jazbaýdy birneshe ret suradym. Jazylǵandardyń kóbi ótirik, kóbi joramal. Osynyń bári meni odan ári azapqa salady. Biraq amal joq, osy suhbatty berýge májbúr boldym. О́ıtkeni, meniń jeke ómirim adamar úshin teatrǵa aınalyp ketti. Sondyqtan oıdan shyǵarylǵan áńgimelerge tosqaýyl qoıý úshin bárin ózim aıtýdy sheshtim» degen Baıan Esentaeva budan ári qaraı sol kúni bolǵan oqıǵany baıandap berdi. Semıada urys 5 maýsym kúni bastalǵan. Kúıeýiniń qoqan-loqysynan qoryqqan prodıýser úıine bes kún keshigip 10-y kúni qaıtqan. Sol kúni ol kele jatqan taksı svetoforda toqtap turǵanda mashınaǵa kózdi ashyp-jumǵansha kúıeýi kirip kelgen. Sosyn qolynda pyshaǵyn áıeline suǵyp alǵan. Baıan bul sátte esh aýrýdy sezbegenin tek, kózinen judyryqpen urǵanda ǵana aýrýdy sezgenin aıtady. Odan keıin kúıeýi ony basqa mashınaǵa kirgizip, eki saǵat boıy uryp-soqqan. «Barlyq jerimnen qan aqty. Ernim bólinip ketti, tisimdi túsirdi, betimdi tildi, murnymdy syndyrdy. Balalardy oılasaıshy degen sózim úshin taǵy bir soqqy aldym. Sodan beri úsh aı ótse de sol jaǵymnyń eti semip qalǵan, ekinshi deńgeıde kontýzııa aldym, sol jaq kózim kórmeıdi» deıdi Baıan. Rasynda suhbatta prodıýserdiń sol jaq kózi tolyq jumylmaıtyny kórinedi. Esentaeva budan bylaı áıelder quqyn qorǵaýmen aınalysqysy keledi Baıan Esentaeva suhbat boıy birde-bir ret burynǵy kúıeýin atymen ataǵan joq. Tek «ol» dep sóıledi. «Jaqsy áke, jaqsy kúıeý boldy, meni shamasyna qaraı jaqsy kórdi. Biraq men jaqsy kórdim be, másele sonda. Eshkimge bildirgim, shaǵymdanǵym kelmedi. Odan ne ózgeredi? Birneshe jyl boıy ajyrasýdy ótindim. Biraq ol kónbedi. Ajyrassań óltirem dep qorqytatyn. Sońǵy birneshe jyl ómirim úreımen, azappen ótti. Endi osynyń bárin búkil elge jaıyp salyp otyrmyn. Sebebi, qanshama áıel osylaı ómir súrip jatyr. Úreımen, zańdy bilmeı ómir súrýde. Áıteýir bireýi aıtýy kerek qoı muny» dedi belgili prodıýser. Ol endi turmystyq zorlyq-zombylyqtan zardap shekken áıelderdiń quqyn qorǵaıtyn qoǵamdyq uıym qurmaq ekenin málim etti. Osyndaı jaǵdaıǵa ushyraǵaly beri ózine birde-bir áıelder uıymy habarlaspaǵanyn, kómek usynbaǵanyn aıtty. «Sondyqtan áıelder máselesimen aınalysatyn bir uıym kerek dep oıladym. О́ıtkeni, áıelge qol jumsaıtyn erkekter zań boıynsha jazalanady. Áıelder muny bilmeıdi. Múmkin, olardyń problemasyna nazar aýdarý úshin meniń osyndaı jaǵdaıǵa ushyraýym kerek bolǵan shyǵar» dedi Baıan Esentaeva.