Reseıde Qazaqstannyń áskerı ónimderi usynyldy

Reseıde áskerı jáne qos maqsattaǵy qazaqstandyq óndiristiń 50-ge jýyq buıymy usynyldy, dep jazdy Qorǵanys mınıstrliginiń resmı saıty. Ujymdyq qaýipsizdik týraly shart uıymynyń delegasııasy Bas hatshy Nıkolaı Bordıýjanyń basshylyǵymen «Armııa-2016» halyqaralyq áskerı-tehnıkalyq forýmy barysynda qazaqstandyq stendti tamashalady. «Qazaqstan ınjınırıng» UK» AQ basqarma tóraǵasy Erlan Ydyrysov ulttyq kompanııanyń qyzmeti týraly áńgimelep, meımandardy tehnıka men qarý-jaraqtyń jańa úlgilerimen tanystyrdy. Forýmda elimizdiń alty kásiporny ónimderin usyndy. Olar: «Qazaqstan Paramaýnt Injınırıng» JShS, «KAE» JShS, «S.M. Kırov atyndaǵy zaýyt» AQ, «S.M. Kırov atyndaǵy mashına qurastyrý zaýyty» AQ, «№405-avıajóndeý zaýyty» AQ jáne «Zhasampaz» konsorsıýmy. Kompanııanyń stendinde áskerı jáne qos maqsattaǵy buıymdardyń 46 tabıǵı úlgisi men 13 sulbasy qoıylǵan. Olardyń arasynda túngi kórý kózdeýishteri, jylý vızııalyq júıeler, barlaý jáne qadaǵalaý aspaptary, korablder men sýasty qaıyqtardy óndirýshilerge arnalǵan keme gıdravlıkasynyń tolymdaýshy buıymdary, Mı-17V-5, Mı-8 tikushaqtarynyń sulbalary, sondaı-aq, qazaqstandyq óndiristiń brondy keýdesheleri, shlemderi men áskerı kıim-keshegi bar. Aıdar О́RISBAEV