1993
*
1 qańtarda Prezıdent N.Á. Nazarbaevtyń el halqyna arnaǵan Jańa jyldyq quttyqtaý sózi «Egemen Qazaqstan» gazetine jarııalandy. Quttyqtaýda Elbasy ótken 1992 jyl halyq zerdesinde, el tarıhynda jas memlekettiń shynaıy egemendik, táýelsizdik jolyna túsken jyly retinde qalatynyn atap aıtty. Sonymen birge, Elbasy óz sózinde Qazaqstannyń tynysh qalpynyń qadir-qasıetin baǵalaı bilý qajettigine de ekpin berdi. «Tynysyń tarylǵanda aýanyń qadirin bilersiń, qantógisti kórgende beıbit kúnniń qadirin bilersiń» degen sóz ras. Sondyqtan da tatýlyq pen tynyshtyq respýblıkamyzdyń basty baılyǵy ekenin bir sátke de esten shyǵarmaıyq. Ony ortaq kúsh-jigermen ǵana saqtap, nyǵaıtýǵa bolatynyn umytpaıyq», – dedi Prezıdent.
*4 qańtarda Tashkentte Ortalyq Azııa memleket basshylarynyń kezdesýi ótti. Kezdesýde negizinen TMD elderindegi saıası jáne ekonomıkalyq jaǵdaı, aımaq memleketteri arasyndaǵy san qyrly baılanystardy odan ári nyǵaıtý máseleleri talqylandy. Sondaı-aq, Qazaqstan Prezıdenti N.Á.Nazarbaevtyń usynysymen taraptar «Araldy qorǵaý» halyqaralyq qoryn qurý týraly sheshim qabyldady.
* 7 qańtarda Elbasy Nursultan Nazarbaev Eýropanyń Qaıta qurý jáne damý bankiniń prezıdenti Jak Attalıdi qabyldady. Kezdesýde qarjy saıasaty men jekeshelendirý máselelerine erekshe nazar aýdaryldy. Osy kúni Memleket basshysynyń tóraǵalyǵymen Konstıtýsııalyq komıssııanyń májilisi ótti. Onda Joǵarǵy Keńestiń toǵyzynshy sessııasynyń ekinshi kezeńine, depýtattardyń túpkilikti qabyldaýyna engizilip otyrǵan eldiń Negizgi Zańynyń jobasy talqylandy.
* 9 qańtarda Elbasy Nursultan Nazarbaev Qazaqstan Respýblıkasynyń Reseı, Germanııa, Fransııa, Iran, Ázerbaıjan, Armenııa, Belarýs, Grýzııa, Qyrǵyzstan, Túrikmenstan, О́zbekstan, Ýkraına memleketterindegi elshilikterin ashý týraly jarlyqtarǵa qol qoıdy. Osy kúni Omby qalasynda Reseı men Qazaqstan úkimet delegasııalarynyń, eki eldiń irgeles aımaqtary basshylarynyń kezdesýi bolyp ótti. Burynǵy ekonomıkalyq baılanystar buzylyp, eki jaq ta dástúrli naryǵynan aıyrylyp qalǵan kúrdeli kezeń úshin bul kezdesýdiń betburystyq máni boldy.
* 11 qańtarda Prezıdent N.Á.Nazarbaevtyń Jarlyǵymen Jańa ekonomıkalyq qurylymdardy qoldaý jáne monopolııalyq qyzmetti shekteý jónindegi memlekettik komıteti Qazaqstan Respýblıkasynyń Monopolııaǵa qarsy saıasat jónindegi memlekettik komıteti bolyp qaıta quryldy. Osy kúni Prezıdent Qazaq aýyl sharýashylyǵy ǵylymdary akademııasynda agrarshy ǵalymdar tobymen kezdesti. Áńgime negizinen Qazaqstannyń agroónerkásip keshenin damytý tujyrymdamasy týraly boldy.
* 12 qańtarda Memleket basshysy Nursultan Nazarbaev «Qazaqstan Respýblıkasynyń Ekonomıkalyq ózgerister ulttyq keńesin qurý týraly» Jarlyqqa qol qoıdy. Ol daǵdarysqa qarsy shuǵyl sharalar men áleýmettik-ekonomıkalyq reformalardy tereńdetý baǵdarlamalaryn júzege asyrýdy qamtamasyz etý maqsatyn kózdeıdi. Bul kúni Prezıdent N.Á.Nazarbaev respýblıkanyń agrarlyq-ónerkásiptik kesheni qyzmetkerlerimen kezdesti.
* 13 qańtarda «Qazaqstan Respýblıkasynyń memlekettik shekarasy týraly» Zań qabyldandy.
* 15 qańtarda 1992 jyldyń sońynda qurylǵan Respýblıka Keńesiniń alǵashqy májilisi ótkizildi. Keńes respýblıkanyń áleýmettik-ekonomıkalyq damýynyń qorytyndysy men 1993 jylǵa arnalǵan mindetterdi talqylady. Talqylaýdy qorytyndylaı kelip, Prezıdent N.Á.Nazarbaev Úkimettiń endi naryqtan sheginbeıtinin qadap aıtty. Keńes májilisinde, sondaı-aq, respýblıkada tilderdi damytý jónindegi qosymsha sharalar týraly másele de qaraldy. Til saıasatymen maqsatty túrde aınalysatyn memlekettik komıtet qurý usynysy aıtyldy. Kóp uzamaı ondaı komıtet quryldy.
*18 qańtarda Qazaqstan Respýblıkasy Prezıdenti janynan Bas baqylaý ınspeksııasy quryldy. Sondaı-aq, osy kúni Prezıdent N.Á.Nazarbaev Joǵarǵy Keńestiń sessııasyna qatysyp, sóz sóıledi. Alqaly jıynda Prezıdent Úkimettiń daǵdarysqa qarsy baǵdarlamasyna búkil halyqtyq qoldaý qajet ekenin atap kórsetti. Elbasy sózi «Egemen Qazaqstannyń» 20 qańtardaǵy nómirine tolyq jarııalandy.
* 21 qańtarda Prezıdent Jarlyǵymen Ábish Kekilbaev Qazaqstan Respýblıkasynyń Memlekettik keńesshisi bolyp taǵaıyndaldy.
Osy kúni respýblıka Mınıstrler Kabınetiniń qaýlysymen Nurlan Orazalın «Egemen Qazaqstan» gazetiniń bas redaktory bolyp bekitildi.
* 22 qańtarda Mınsk qalasynda TMD elderi basshylarynyń kezekti kezdesýi bolyp ótti. Kezdesýde Memleketaralyq bank qurý týraly kelisimge qol qoıyldy. Sondaı-aq, TMD Jarǵysynyń jobasy qaraldy.
* 23 qańtarda Prezıdent N.Á.Nazarbaev «Qazaq KSR-indegi halyq depýtattarynyń mártebesi týraly» zańǵa ózgerister men tolyqtyrýlar engizý týraly» Zańǵa qol qoıdy. Zańǵa sáıkes Joǵarǵy Keńes endi ózderiniń depýtattyq mindetterin oryndamaıtyn, parlamentpen jáne saılaýshylarmen baılanysyn úzgen halyq depýtattarynyń ókilettikterin doǵarý týraly máseleni qarap, sheshýge quqyly bolyp belgilendi.
* 28 qańtarda Joǵarǵy Keńes Qazaqstan Respýblıkasynyń tuńǵysh Konstıtýsııasyn talqylaý jáne qabyldaý jónindegi jumysyn aıaqtady. Parlamenttegi 312 depýtattyń 309-y Konstıtýsııany tutasymen qabyldaý jónindegi usynysty qoldady. Prezıdent Nursultan Nazarbaevqa Qazaqstannyń tuńǵysh Konstıtýsııasynyń túpnusqa mátini tabys etildi. О́z kezeginde Elbasy Nursultan Nazarbaev halyq depýtattaryna, quqyq salasyndaǵy mamandarǵa, sheteldik dostarǵa, qazaqstandyqtarǵa, respýblıkanyń jańa Konstıtýsııasyn jasaýǵa belsendi qatysqandardyń barlyǵyna rızashylyqpen alǵys bildirdi. Osylaısha, 28 qańtar Táýelsiz Qazaqstannyń tuńǵysh Konstıtýsııasy qabyldanǵan kún retinde tarıhqa endi.
*29-31 qańtarda Prezıdent N.Á.Nazarbaev Shveısarııanyń Davos qalasynda ótken Álemdik ekonomıkalyq forýmnyń jumysyna qatysty.
*1 aqpanda Belgııaǵa eki kúndik resmı saparmen kelgen Qazaqstan Prezıdenti N.Á.Nazarbaev el koroli Bodýenmen, Premer-mınıstr Jan-Lıýk Deanmen áńgimelesti. Budan bólek, Soltústik Atlantıka odaǵynyń shtab-páterinde NATO-nyń Bas hatshysy Manfred Bernermen kezdesti.
* 2 aqpanda Qazaqstan Prezıdenti N.Á.Nazarbaev Avstrııa astanasy Venada federaldy kansler Frans Vranıskıımen kezdesti. Kelissóz barysynda ekijaqty yntymaqtastyqty damytý máseleleri sóz boldy.
