Orta salmaqta WBA (Super), IBO, IBF jáne WBC boıynsha álem chempıony Gennadıı Golovkın (35-0, 32 KO) men jartylaı orta salmaqtaǵy IBF belbeýiniń ıesi brıtandyq Kell Brýktiń (36-0, 25 KO) arasyndaǵy jekpe-jek merziminen buryn aıaqtaldy. Londonda 20 myń adam sııatyn arenada ótken aıqastyń 5-raýndynda brıtandyqtyń sekýndanty aq oramal tastady.
Jekpe-jektiń birinshi raýndynda-aq Brýk nokaýtqa túse jazdap áreń qaldy. Alaıda, ekinshi raýndta ol shıraq qımyldap Golovkınge biraz soqqysyn dál tıgizdi.
Úshinshi raýndta Brýk qulap qalǵan edi, biraq tóreshi onyń aıaǵy taıyp ketti dep eseptedi. Tórtinshi raýndta da qazaqstandyq boksshy qarsylasyn dál soqqylarmen tópeledi. Besinshi raýndta Golovkınniń soqqylary brıtandyqqa óte aýyr tıip jatqany anyq kórine bastady. Brýk bul raýndta birde-bir soqqy jumsaǵan joq. Raýnd aıaǵyna jetpeı Brýktiń bapkeri Domınık Ingl oramal bulǵap jekpe-jekti toqtatýǵa ótinish bildirdi. Alaıda, rıngtegi tóreshi ony kórmedi jáne shýyldan estı de almady. Sol aralyqta Golovkın qarsylasyna taǵy birneshe soqqy jumsady. Tek sekýndant oramalyn rıngke laqtyrǵannan keıin ǵana aıqas toqtatyldy.
Osylaısha Gennadıı Golovkın kásipqoı bokstaǵy 36-shy jeńisine jetti.
Jekpe-jekten keıin bergen suhbatynda Golovkın «Londonǵa, jurtshylyqqa, barsha jankúıerlerge alǵys aıtqym keledi. Kell iri jáne jaqsy boksshy, onyń sheberligine jáne menen qaımyqpaǵanyna rıza boldym. Bul men úshin bir sparrıng sııaqty boldy, qarsylas maǵan qıyndyq týdyra almady. Brýktiń bapkeriniń sheshimin de túsinemin, óıtkeni ol aıqastyń aıaqtalýǵa jaqyn ekenin kóre bildi. Endi men barlyq boksshylardy, sonyń ishinde kishi Iýbenkti jekpe-jekke shaqyram, biraq aldymen Bıllı Djo Sonderspen kezdeskim keledi», - dedi Golovkın.
