Ulysty uıystyrǵan – ulyq mereke

    Búgin Memleket basshysy Nursultan Nazarbaev Astanadaǵy «Áziret Sultan» meshitine baryp, qazaqstandyq barsha musylmandardy qasıetti Qurban aıt merekesimen quttyqtady. «Áziret Sultan» meshitine tańǵy namaz aıaqtalǵan boıda kelgen Qazaqstan Prezıdenti Nursultan Nazarbaev: «Qurmetti musylman qaýym! Búgin Jer sharyndaǵy búkil musylmandar qasıetti mereke – Qurban aıtty atap ótip jatyr. Bul dinnen de, ata-babamyzdan da dástúr alyp kele jatqan Allanyń, Paıǵambarymyzdyń (s.ǵ.s.) qaldyryp ketken ósıeti. Qurban aıt kezinde qazaq jurty meıirbandyq tanytyp, bir-birimen kórisip, búkil jurtqa, xalyqqa jaqsylyq tileıdi. Otbasynyń berekesi, eldiń tynyshtyǵy úshin qurban shalyp, namaz oqıdy. Sonyń bári Allanyń qulaǵyna shalynyp, elimiz aman, jurtymyz tynysh bolsyn. «Musylmandar bólinbeý kerek, bólshektenbeý kerek», degen sóz bar. Sondyqtan búgingi qıyn-qystaý jaǵdaı bolyp jatqanda musylmandardyń, eldiń birligi asa kerek», – dedi. Odan ári Elbasy elimizdiń berekesi birligimizdiń arqasynda nyǵaıyp otyrǵanyn sóz etti. «Biz bıyl elimizdiń 25 jyldyq Táýelsizdigin atap ótip jatyrmyz. Osy 25 jyldyqqa bereke-birliktiń, tatýlyqtyń arqasynda, jettik. Quranda jazylǵandaı, musylman jurty eldi ulysqa, ultqa eshqashan bólmeıdi. Barlyǵy dindi birdeı kóredi. Sol birlik bizdi alǵa qaraı alyp kele jatyr. Ár ýaqytta da Alla jar bolyp, qoldap, elimizdiń, qazaǵymyzdyń bolashaǵyn baıandy etsin!» – dedi Memleket basshysy. Joldybaı Bazar, «Egemen Qazaqstan»