Aqtóbe qalasynda Qazaqstan drama teatrlarynyń HHIV respýblıkalyq festıvali ótip jatyr. Bul mádenı sharany Mádenıet jáne sport mınıstrligi oblys ákimdigimen birlesip uıymdastyrǵan. Festıvaldiń maqsaty elimizde teatr ónerin nasıhattaý, ony damytý, daryndy akterler men rejısserlerdi yntalandyrý, qazirgi zamanǵy sahna ónerindegi jańa baǵyttardy anyqtaý, óskeleń urpaqty patrıotızm rýhynda tárbıeleýge atsalysý bolyp tabylady. Bıylǵy festıvaldiń ereksheligi – Qazaqstan halqynyń basty ıgiligi sanalatyn el Táýelsizdiginiń 25 jyldyǵy aıasynda ótýi deý oryndy bolmaq.
Dramalyq teatrlar festıvalin uıymdastyrýdyń maqsaty men máni jaıynda qazylar alqasy men uıymdastyrý komıteti ókilderiniń qatysýymen ótken baspasóz máslıhatynda jan-jaqty aıtyldy. Mádenıet jáne sport mınıstrligi basqarma basshysynyń mindetin atqarýshy Gúlnafıs Myrzasheva bul mádenı sharanyń 1992 jyldan beri elimizdiń barlyq qalalarynda uıymdastyrylǵanyn, al, Aqtóbede osymen ekinshi ret ótkizilip otyrǵanyn tilge tıek ete kelip, festıvalǵa qatysýshy teatrlardyń klassıkalyq spektakldermen birge, otandyq avtorlar týyndylaryn kórermender nazaryna usynatynyn jetkizdi. Ol, sondaı-aq, irikteýge 30 teatrdan ótinim túskenin, solardyń arasynan bul jolǵy festıvalǵa segiz teatrdyń joldama alǵanyn, bir teatrdyń konkýrstan tys qatysyp otyrǵanyn aıtty. Ásirese, jas rejısserlerdiń qoıylymdaryna basymdyq berilgenin, qoıylymdar erkin taqyrypta bolatynyn atap ótti.
M.Áýezov atyndaǵy Qazaq memlekettik akademııalyq drama teatrynyń dırektory, Qazaqstan Respýblıkasynyń eńbek sińirgen qaıratkeri Erlan Bilál festıvaldiń teatrlardyń qoıǵan spektaklderin baǵalaý arqyly olardyń qandaı deńgeıge kóterilgenin, akterlerdiń qanshalyqty shyǵarmashylyǵy shyńdalǵanyn saraptaýǵa múmkindik týǵyzatynyn jetkizdi.
Festıvaldi kirispe sóz sóılep ashqan oblys ákiminiń orynbasary Asqar Bıahmetov mádenı sharanyń el Táýelsizdiginiń 25 jyldyǵy aıasynda uıymdastyrylyp otyrǵanyn aıta kelip, bul sharanyń óneri men óndirisi damyǵan óńirde ótkizilýi úlken jaýapty da mereıli mindet júkteıtinin atap ótti. Al saltanatty sátte sóz alǵan Mádenıet jáne sport mınıstrligi basqarma basshysynyń mindetin atqarýshy Gúlnafıs Myrzasheva Mádenıet jáne sport mınıstri Arystanbek Muhamedıulynyń quttyqtaý hatyn oqyp berdi, festıvalǵa qatysýshylarǵa shyǵarmashylyq tabys tiledi.
Festıval shymyldyǵy Soltústik Qazaqstan oblystyq S.Muqanov atyndaǵy qazaq mýzykalyq drama teatry sahnalaǵan Q.Tolybaıulynyń «Daýylpaz baba – Qojabergen» spektaklimen ashyldy. Spektakldiń rejısseri – Batyrbek Shambetov.
Festıval kúnderi kórermender tarıhymyzdan syr shertetin qundy qoıylymdarmen qatar, dramatýrgııa klassıkteri Ý.Shekspır, A.Chehov, N.Gogol, Sh.Aıtmatov syndy avtorlardyń týyndylarymen de tanysa alady. Aqtóbelikter tórt kún boıy sahna ónerinen ádemi áser alyp, akterlerdiń shyǵarmashylyq sheberligine tánti bolady degen úmittemiz.
Satybaldy SÁÝIRBAI,
«Egemen Qazaqstan»
AQTО́BE
