Almaty qalasynyń 1000 jyldyq mereıtoıyna qatysty sharalarǵa qatysyp sóz sóılegen Memleket basshysy Nursultan Nazarbaev Úlken Almaty aınalma avtojoly týraly da aıtty dep habarlaıdy Egemen-aqparat. «Kelesi jyly «Nurly jol» baǵdarlamasy aıasynda Úlken Almaty aınalma avtojolynyń qurylysy bastalady. Bul memleket úshin 2017 jyldyń basty sharýalary qatarynan bolǵaly otyr» dedi Elbasy. Sonymen qatar Nursultan Nazarbaev atalǵan jobanyń mańyzdylyǵyna toqtaldy. «Birinshiden, qalaǵa kiretin mashınalar sany azaıady. Ekinshiden, Qytaı men Batys Eýropany jalǵaıtyn magıstral Almaty arqyly ótetin bolady. Bul qalanyń damýyna úlken serpin beredi. Úlken Almaty aınalma joly Batys Eýropa-Batys Qytaı dep atalǵan halyqaralyq magıstraldiń bir bóligi bolmaq», dedi Prezıdent.
Úlken Almaty aınalma avtojoly
Almaty qalasy kóshelerindegi mashınalar sanyn azaıtýǵa baǵyttalǵan avtokólik jolynyń jobasy. Jol Qarasaı, Ile jáne Talǵar aýdandarynyń terrıtorııasymen ótedi. Bastapqy esep boıynsha, jobanyń quny 79 mlrd teńge. Uzyndyǵy – 65,5 kılometr. Tehnıkalyq kategorııasy – 1 «a», aqyly.
Aınalma jol 14 kópir, eki deńgeıli 8 avtokólik aınalmasynan (razvıazka) turady. Sonymen qatar ol eki jerde temir joldy, respýblıkalyq deńgeıdegi 5 avtokólik jolyn, jergilikti deńgeıdegi 14 joldy jáne 8 dala jolyn basyp ótýi tıis. Joba keı jerlerde elektr lınııalaryn, sý qubyrlaryn, káriz júıelerin aýystyrýdy qajet etedi.
Jol Almatynyń batysyndaǵy Qyrǵaýyldy aýylynyń tusynan bastalyp, shyǵys jaǵynda Almaty-Talǵar trassasynyń 22-shi kılometrinen aıaqtalady. Saıajaılar, sharýa qojalyqtary ornalasqan aımaqpen ótedi.
Úlken Almaty aınalma jolyn salý úshin 724 jer ýchaskesin satyp alý kózdelgen bolatyn. Onyń 714-i satyp alyndy.
Alǵashqy jospar boıynsha 2014 jyly salynyp bitýi tıis-ti. Alaıda, qarjy daǵdarysyna baılanysty jobany iske asyrý ýaqytsha toqtatyldy.
Egemen-aqparat
