Altyn medal úshin aıqasamyz

Keshe Qazaqstannyń voleıboldan qyzdar quramasy Vetnamda ótip jatqan Azııa Kýbogynyń jartylaı fınalynda Japonııa komandasyn 3:1 etip jeńip, óziniń tarıhynda tuńǵysh márte osy jarystyń fınalyna shyqty. Sóıtip, Kúnshyǵys eli boıjetkenderinen toptyq kezeńdegi jeńilisiniń esesin qaıtaryp qana qoıa salmaı, alǵash ret altyn medal úshin talasýǵa múmkindik aldy. Bas jattyqtyrýshy Vıacheslav Shaprannyń shákirtteri bul kezdesýde úlken jiger men tabandylyq tanytty. Olar matchtyń birinshi partııasynda qarsylastarynan 19:25 esebimen utylsa, kelesi úsh partııany túgeldeı 25:11, 25:21, 25:16 degen eseptermen óz paıdalaryna sheshe bildi. Kelesi jartylaı fınaldyq jupta Qytaı qyzdary taılandtyq qurbylarynan 3:2 esebimen basym túsip, fınaldyq dýettiń ekinshi syńaryn qurady. Bizdiń qyzdar munyń aldynda alań ıeleri – Vetnam jasaǵyn 3:0 etip tize búktirgen bolatyn. Al toptyq irikteý oıyndarynda Japonııadan jeńilip (1:3), Koreıa (3:0) men Qytaıdy (3:2) utyp, 5 upaımen úshinshi oryn alǵan edi. Eske sala keteıik, qyzdar komandalary arasyndaǵy Azııa kýbogy 2008 jyldan beri eki jylda bir ret oınalyp keledi. Oǵan qurlyqtyń 8 kúshti komandasy qatysady. Týrnırde 2008, 2010, 2014 jyldary – Qytaı, al 2012 jyly Taıland quramasy bas báıgeni jeńip alǵan edi. Qazaqstandyqtar 2012, 2014 jyldary qola júldeger atanǵan. Fınaldyq kezdesý búgin oınalady.   Rýslan IGILIK